Յունիս 5-ին ՀՀ սփիւռքի նախարարի տեղակալ Սերժ Սրապիոնեան ընդունեց  «Իրան-Հայաստան բարեկամութեան միութիւն» հասարակական կազմակերպութեան պատուիրակութեան գործադիր տնօրէն Մոհամմատ Ռեզա Տամաւանտիի գլխաւորութեամբ:

Ողջունելով հիւրերը` Ս. Սրապիոնեան յոյս յայտնեց, որ հանդիպումը կը նպաստէ հայ-իրանական բազմադարեայ բարեկամական կապերու ամրապնդման: Անդրադառնալով «Իրան-Հայաստան բարեկամութեան օրեր» ծրագիրի ծիրէն ներս Ս. Թադէի վանք ուխտագնացութեան կազմակերպման հարցերուն` Ս. Սրապիոնեան նշեց, որ ուխտագնացութեան կը մասնակցի նաեւ «Իրան-Հայաստան բարեկամութեան միութիւն» հասարակական կազմակերպութիւնը: Նախարարի տեղակալը աւելցուց նաեւ, որ Սփիւռքի նախարարութիւնը կապ  հաստատած է Ատրպատականի թեմի առաջնորդ Գրիգոր ծ. վրդ. Չիֆթչեանի եւ Ս. Թադէի վանքի առաջնորդին հետ, որուն արդիւնքով ծրագիրի իրականացման շուրջ ձեռք  բերուած են որոշակի պայմանաւորուածութիւններ:

Շնորհակալութիւն յայտնելով ընդունելութեան համար` Տամաւանտին նշեց, որ տարիներու ընթացքին աւելցած  է Ս. Թադէի վանք ուխտագնացութեան մասնակիցներու թիւը, որ շատ կարեւոր է:

 Հիւրերը անդրադարձան նաեւ «Թաւրիզահայութեան մշակոյթի օրեր» նախատեսուող ձեռնարկի ծրագիրին եւ Սփիւռքի նախարարութեան հետ համագործակցութեան հարցերուն: