Ս. Փեթերսպուրկի Հայ Առաքելական Սուրբ Կատարինէ եկեղեցւոյ «Վերնատուն»
մշակութային կեդրոնին մէջ տեղի ունեցաւ հայկական տարազներու ցուցադրում, որ
համատեղ կազմակերպած էին Երեւանի «Տէրեան» մշակութային կեդրոնը եւ քաղաքի
հայկական համայնքը:

Ս. Փեթերսպուրկէն «Ամէնփրէս»-ի թղթակիցը կը հաղորդէ, որ ցուցադրման
ներկայացուած տղամարդու եւ կանանց ազգային ոճով ձեւաւորուած զգեստները
պատրաստած են կեդրոնի շնորհալի դերձակներն ու մոտելաւորողները:
«Ազգագրական տեսակէտէն մեր ներկայացուցած տարազները ունին նաեւ ճանաչողական
նշանակութիւն եւ կը համարուին ազգային արժէք: Մեր գործունէութեան
ընթացքին մենք կ’այցելենք թանգարաններ, կ’ուսումնասիրենք հագուստներու
թանգարանային նմուշները եւ ատոնք մեր արուեստանոցներուն մէջ կը մոտելաւորենք ու
կը վերարտադրենք: Բացի այդ, մենք կ’ընդունենք պատուէրներ:
Մեր պատուիրատուները ազգային պարարուեստը ներկայացնող համոյթներն են,
թատրոնները, անհատ կատարողները, բեմադրիչները, անգամ հարսնացուները եւ
այլք»,-ըսաւ «Տէրեան» մշակութային կեդրոնի ներկայացուցիչ Թագուհի
Սիմաւորեան:

Ատոնք հիմնականին մէջ փոխառնուած են Արեւմտեան Հայաստանի Վասպուրականի շրջանի
Վան, Էրզրում, ինչպէս նաեւ Խարբերդի, Սասունի, Պիթլիսի, Ալեքսանտրոփոլի
բնակիչներու հագուստներէն եւ ուշադրութիւն կը գրաւեն իրենց
բազմազանութեամբ, զարդանախշերու բազմերանգութեամբ ու տեղի
գունեղութեամբ: Տարազներու ցուցադրման շնորհիւ ներկաները պատկերացում
կազմեցին Արեւմտեան Հայաստանի բնակիչներու կրած հագուստներու մասին: