ԼՂՀ կեդրոնական ընտրական յանձնաժողովի այս տարուան Մայիս 10-ի հերթական նիստին ամփոփուած են 2015 թուականի Մայիս 3-ին կայացած ԼՂՀ Ազգային ժողովի հերթական ընտրութիւններու վերջնական արդիւնքները ու կայացուած են որոշումներ 2015 թուականի Մայիս 3-ի ԼՂՀ Ազգային ժողովի ընտրութիւններու արդիւնքներուն վերաբերեալ եւ 2015 թուականի Մայիս 3-ի ԼՂՀ Ազգային ժողովի համամասնական ընտրակարգով ընտրութիւններու արդիւնքներով պատգամաւորներ ընտրուելու մասին:

ԼՂՀ կեդրոնական ընտրական յանձնաժողովի մամուլի ծառայութիւնը կը տեղեկացնէ, որ Լեռնային Ղարաբաղի Հանրապետութեան Ազգային ժողովի համամասնական ընտրակարգով պատգամաւորներ ընտրուած են «Ազատ հայրենիք» կուսակցութեան ընտրական ցուցակէն` 11 պատգամաւոր, «Ազգային վերածնունդ» կուսակցութեան ընտրական ցուցակէ` 1 պատգամաւոր, Արցախի Ժողովրդավարական Կուսակցութեան ընտրական ցուցակէն` 4 պատգամաւոր, «Հայ յեղափոխական դաշնակցութիւն» կուսակցութեան ընտրական ցուցակէն` 4 պատգամաւոր, «Շարժում­88» կուսակցութեան ընտրական ցուցակէն` 2 պատգամաւոր:

ԼՂՀ ընտրական օրէնսգիրքի 123-­րդ յօդուածի 8-­րդ մասի դրոյթներու հաշուառումով, ԼՂՀ կեդրոնական ընտրական յանձնաժողովը Մայիս 18-ին պիտի հրապարակէ համամասնական ընտրակարգով ընտրուած ԼՂՀ Ազգային ժողովի պատգամաւորներուն անուանական ցուցակը:

«Ազգային ժողովի կանոնակարգ» ԼՂՀ օրէնքի 34-­րդ յօդուածի 1-­ին մասի համաձայն`Սահմանադրութեան 82-­րդ յօդուածին համապատասխան` նորընտիր Ազգային ժողովի առաջին նստաշրջանը կը գումարուի պատգամաւորներու ընդհանուր թիւի առնուազն երկու երրորդի ընտրութենէն ետք, երրորդ Հինգշաբթի օրը` ժամը 11-­ին, որուն մասին կը յայտարարէ կեդրոնական ընտրական յանձնաժողովը: