Վանայ լիճի Ախթամար կղզիի Սուրբ Խաչ հայկական եկեղեցին ներկայիս Թուրքիոյ տարածքին մէջ գտնուող եւս 9 պատմամշակութային կոթողներու հետ ընդգրկուած է UNESCO-ի համաշխարհային ժառանգութեան նախնական  ցուցակին մէջ:

ermenihaber.am-ի փոխանցմամբ` թրքական «Taraftar» լրատուական կայքը կը յայտնէ, որ նշեալ եկեղեցին ճարտարապետական առումով միջնադարի հայկական արուեստի ամենավառ յուշարձաններէն մէկն է:

Ներկայացնելով եկեղեցւոյ պատմութիւնը` կայքը կը գրէ, որ այն կառուցուած է 915-921թթ. Գագիկ Առաջին թագաւորի հրամանով, իսկ ճարտարապետը եղած է Մանուէլը: Եկեղեցւոյ պատերը զարդարուած է հարթաքանդակներով, ուր պատկերուած են  բոյսեր, կենդանիներ եւ սուրբգրային դրուագներ:

Թրքական լրատուամիջոցի համոզմամբ` Սուրբ Խաչ եկեղեցւոյ ընդգրկումը UNESCO-ի համաշխարհային ժառանգութեան նախնական  ցուցակին մէջ կը նպաստէ քաղաքի զբօսաշրջութեան զարգացման:

Թուրքիոյ մշակոյթի նախարար Օմեր  Չելիք ըսած է, որ զինք շատ  կ’ուրախացնէ  այդ փաստը: Ան միաժամանակ յիշեցուցած է, որ Թուրքիոյ իշխանութիւնները թոյլ  տուած են հայերուն  Ախթամարի մէջ տարին մէկ անգամ պատարագ մատուցել:

Չելիք նաեւ նշած է, որ եկեղեցւոյ ընդգրկումը այդ նախնական ցուցակին մէջ յատկապէս այս շրջանին օրինակ եւ «ուղերձ պիտի ըլլայ օտարերկրկեայ խորհրդարաններուն համար, որոնք Հայկական սփիւռքի քարոզչութեան ազդեցութեան տակ  մնացած են»: Ըստ Չելիքի` օտարերկրեայ  խորհրդարանները կը քաղաքականացեն այն ցաւալի դէպքերը, որոնք տեղի  ունեցած են  թուրքերու եւ հայերու միջեւ ու ցաւ պատճառած երկու կողմերուն ալ: