Նոյեմբեր 1-ին  Փարիզի մէջ տեղի ունեցաւ Հայ Առաքելական Եկեղեցւոյ (ՀԱԵ)  Ֆրանսայի  թեմի առաջնորդի ընտրութիւնները, Եպիսկոպոսաց պատուիրակութիւններու վեհաժողովի արտահերթ հաւաքի ժամանակ: Ինչպէս կը տեղեկացնեն ՀՀ սփիւռքի նախարարութեան Եւրոպայի հայ համայնքներու վարչութենէն, Ֆրանսայի հայոց թեմի առաջնորդ ընտրուած է ՀԱԵ Բրիտանական եւ Իրլանտական թեմի առաջնորդ Վահան Յովհաննիսեան:

Տ. Վահան ծայրագոյն վարդապետ Յովհաննիսեան  (աւազանի անունով` Սարգիս)  ծնած է 1963թ. Պաղտատ (Իրաք): 1988թ. ձեռամբ Իրաքի Հայոց թեմի առաջնորդ Տ. Աւագ արքեպիսկոպոս Ասատուրեանի ձեռնադրուած է սարկաւագ եւ մեկնած ԱՄՆ` ուսումը շարունակելու  Նիւ Եորքի Ս. Վլատիմիր     աստուածաբանական ճեմարանին մէջ: 1990թ. ձեռամբ  Տ. Աւագ արքեպիսկոպոս Ասատուրեանի ձեռնադրուած  է  կուսական քահանայ: 1995թ. պաշտպանելով վարդպապետական ատենախօսութիւնը` ստացած է Մասնաւոր  վարդապետութեան   առաջին չորս  աստիճանները` ձեռամբ  ԱՄՆ Հայոց Արեւելեան թեմի առաջնորդ  Տ. Խաժակ արքեպիսկոպոս  Պարսամեանի: 2006թ. ստացած է ծայրագոյն  վարդապետութեան  աստիճան` պաշտպանելով  ատենախօսութիւն  «Գ. Կորնթացիս թուղթը» թեմայով: Այս տարիներուն իբրեւ հոգեւոր հովիւ  ծառայած է  Նիւ Եորքի Ս. Խաչ եւ Նիւ Ճերսիի Սրբոց Ղեւոնդեանց եւ Նիւ Եորքի Սրբոց Նահատակաց եկեղեցիներուն մէջ: Որոշ շրջան եղած է Ս. Վարդան առաջնորդանիստ եկեղեցւոյ լուսարարապետը: Ֆորտհեմ համալսարանէն ստացած է  Աստուածաշնչագիտութեան դոկտոր աստիճան:  Վերջին տարիներուն Հայր Վահան կը ծառայէր  ԱՄՆ  Հայոց Արեւելեան  թեմի  Նիւ Եորքի Սրբոց Նահատակաց եկեղեցւոյ մէջ` իբրեւ հոգեւոր հովիւ:

2010-ի Փետրուար 10-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի օրհնութեամբ Մայր Աթոռ Սուրբ Էջմիածինի միաբան Տ. Վահան ծայրագոյն  վարդապետ  Յովհաննիսեան ստանձնած է Հայաստանեայց  Առաքելական Սուրբ Եկեղեցւոյ Մեծ Բրիտանիոյ Հայոց թեմի առաջնորդի պաշտօնը: Տ. Վահան  ծայրագոյն վարդապետ  Յովհաննիսեան Մեծ Բրիտանիոյ  Հայոց թեմի առաջնորդ  ընտրուած է  2009թ.  Դեկտեմբերին գումարուած Բրիտանահայ Համայնքային  եւ Եկեղեցական խորհուրդի ժողովի ընթացքին: Առաջնորդի  ընտրութիւնը հաստատուած է Ամենայն Հայոց Կաթողիկոսի Հայրապետական օրհնութեամբ:

Հայ Առաքելական Եկեղեցւոյ (ՀԱԵ) Ֆրանսայի թեմական խորհուրդը Թեմի առաջնորդի ընտրութեան նոր գործընթացը սկսած էր 2014 թուականի Յունիս 7-ին կայացած նիստին ժամանակ. Թեմական խորհուրդը ընդունած էր նոր ցուցակը, ուր երեք թեկնածու ընդգրկուած էր: Աւելի ուշ այն հաստատուած է Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի կողմէն: Ֆրանսայի թեմի առաջնորդի թեկնածուներն էին. Պենիլիւքսի երկիրներու մէջ արեւմտաեւրոպական առաջնորդական փոխանորդ Զատիկ Աւետիքեան, ՀԱԵ Բրիտանական եւ Իրլանտական թեմի առաջնորդ Վահան Յովհաննիսեան, Ալպերի, Վարի եւ Մոնաքոյի մէջ ՀԱԵ ծխական քահանայ Գրիգոր Խաչատրեան: