Մայիս 7-ին Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսը եղբայրական այցով կը մեկնի Վատիկան, ուր մայիս 8-ին հանդիպում կ’ունենայ Հռոմի Կաթոլիկ Եկեղեցւոյ Քահանայապետ Ֆրանչիսկոս Պապի հետ:

Այցին ընթացքին Ամենայն Հայոց Կաթողիկոսին պիտի ուղեկցին Արժանթինի Հայոց թեմի առաջնորդ Տ. Գիսակ արքեպիսկոպոս Մուրադեանը, ԱՄՆ Հայոց Արեւելեան թեմի առաջնորդ Տ. Խաժակ արքեպիսկոպոս Պարսամեանը, Մայր Աթոռի Միջեկեղեցական յարաբերութիւններու բաժինի տնօրէն, Արթիկի թեմի առաջնորդ Տ. Յովակիմ եպիսկոպոս Մանուկեանը, գաւազանակիր Տ. Անանիա աբեղայ Ծատուրեանը եւ Մայր Աթոռի տեղեկատուական համակարգի տնօրէն Տ. Վահրամ քահանայ Մելիքեանը: Հռոմի մէջ պատուիրակութեան պիտի միանայ նաեւ Իտալիոյ Հայոց հոգեւոր հովիւ Տ. Թովմա աբեղայ Խաչատրեանը:

Մայիս 9-ին Գարեգին Բ Ամենայն Հայոց Կաթողիկոսը Հռոմէն կ’ուղեւորուի Ամերիկայի Միացեալ Նահանգներ, ուր հանդիպումներ կ’ունենայ Մայր Աթոռի բարերարներու հետ` քննարկելու Մայր Աթոռ Ս. Էջմիածինի կողմէ իրականացուող զանազան ծրագիրներ: Այս մասին «Հայերն այսօր»-ին կը յայտնեն Մայր Աթոռի տեղեկատուական ծառայութենէն: