Հինգշաբթի,  9 յունուար 2014-ին, Անթիլիասի մայրավանքին մէջ Արամ Ա. կաթողիկոս յաջորդաբար հանդիպումներ ունեցաւ ընդհանրապէս քրիստոնեայ-իսլամ երկխօսութեան եւ յատկապէս Լիբանանի այժմու կացութեան առնչուած հարցերու գծով.

Քրիստոնեայ–Իսլամ Երկխօսութեան Յանձնախումբի
Նախագահին Այցելութիւնը

Շեհապ, Արամ Ա. կաթողիկոս եւ դոկտ. Սալմանեան

Նախ եւ առաջ վեհափառ հայրապետը ընդունեց Լիբանանի Քրիստոնեայ-իսլամ երկխօսութեան յանձնախումբի նախագահ Հարես Շեհապը: Հանդիպումին ներկայ էր նաեւ նոյն յանձնախումբին մէջ հայ համայնքի ներկայացուցիչ դոկտ. Ժան Սալմանեան: Շեհապ մարոնի համայնքի պատրիարքին կողմէ ղրկուած էր վեհափառ հայրապետին մօտ` խորհրդակցելու համար քրիստոնեայ-իսլամ հոգեւոր պետերու հանդիպում մը կազմակերպելու ծրագիրին շուրջ:

Վեհափառ հայրապետը ողջունեց նման հանդիպման մը կայացումը` շեշտելով, որ հեռու պէտք է պահել զայն քաղաքական հարցերէ, ինչպէս նաեւ միջիսլամական հակասութիւններէ, ընգծելով Լիբանանի ներքին միասնականութիւնը ամրապնդելու հրամայականը` շրջանին մէջ տեղի ունեցող տագնապներուն յարաբերաբար: Հանդիպման ընթացքին նաեւ արծարծուեցան նախագահական ընտրութեան, ինչպէս նաեւ «Ժընեւ-2» ժողովին հետ առնչուած հարցեր:

Սիւննի Եւ Շիի Հոգեւորականներու Համախմբումը
Անթիլիասի Մայրավանքին Մէջ

Սիւննի եւ շիի կրօնաւորներու հետ

Ապա վեհափառ հայրապետը ընդունեց շիի եւ սիւննի համախմբումին մաս կազմող վեց բարձրաստիճան հոգեւորականներ: Անոնք եկած էին` առաջին, վեհափառ հայրապետին պարզելու ընդհանրապէս շրջանին մէջ տիրող կացութիւնը եւ մասնաւորաբար շիի-սիւննի հակասութիւններու ժխտական անդրադարձը: Երկրորդ, վեհափառին հետ խորհրդակցելու կարգ մը նախաձեռնութիւններու մասին, թէ՛ լիբանանեան եւ թէ՛ միջինարեւելեան մակարդակներու վրայ, հակադիր կողմերու տեսակէտները մօտեցնելու եւ գործակցութիւն յառաջացնելու համար, եւ երրորդ` քրիստոնեայ համայնքներու ներկայութիւնը զօրացնելու շրջանին մէջ:

Յիշեալ հարցերուն գծով վեհափառ հայրապետը իր մտահոգութիւններն ու տեսակէտները պարզեց: Ան շեշտեց քրիստոնեայ համայնքներու ներկայութեան կարեւորութիւնը Միջին Արեւելքի մէջ, եւ այս ուղղութեամբ իսլամ կրօնական ու քաղաքական կառոյցներու զօրակցութեան անհրաժեշտութիւնը: Վեհափառը նաեւ շեշտեց երկխօսութեան կենսական կարեւորութիւնը` ըսելով, որ հարցերը կարելի չէ զէնքի ուժով լուծել, այլ միայն` երկխօսութեան ճամբով:

Նախկին Երեսփոխան Մըսպահ Ահտապ
Այցելեց Վեհափառ Հայրապետին

Ահտապ եւ վեհափառ հայրապետը

Այցելուներու կարգին էր նաեւ նախկին երեսփոխան եւ Թրիփոլիի սիւննի ղեկավարներէն Մըսպահ Ահտապ: Ան վեհափառ հայրապետին պարզեց հիւսիսային Լիբանանի մէջ տիրող քաղաքական ու ապահովական կացութիւնը: Իր մտահոգութիւնը յայտնեց Միջին Արեւելքի մէջ տիրող կացութեան ունեցած ժխտական հետեւանքներուն գծով` Լիբանանի ներքին կացութեան վրայ, ապա շեշտեց նոր կառավարութեան կազմութեան ու նախագահական ընտրութեան հրամայականը:

Վեհափառ հայրապետը իր կարգին ընդգծեց հանրապետութեան նախագահի ընտրութիւնը ճշդուած ժամանակին կատարելու եւ սահմանադրական սկզբունքները յարգելու յոյժ կարեւորութիւնը: Վեհափառը նաեւ յիշեցուց, որ ինչպէս Ս. Ծննդեան իր քարոզին մէջ շեշտած էր, Լիբանանի ունեցած բարեկամութիւնները արտաքին ուժերուն հետ պէտք չէ վերածուին ենթակայութեան: Լիբանան իր ինքնորոշման անկախութիւնը պէտք է պահէ ու Լիբանանի գերագոյն շահերը գերիվեր նկատէ համայնքային կամ շրջանային շահերէ ու հաշիւներէ:

http://www.aztagdaily.com