ՀՀ սփիւռքի նախարար Հրանոյշ Յակոբեան  նոյեմբեր 22-ին ընդունեց ֆրանսահայ գործարար Հովել Շնորհոքեանը: Հանդիպման ընթացքին քննարկուեցան Եւրոպայի հայ համայանքներէն հայրենդարձութեան առնչուող հարցեր:

Հովել Շնորհոքեան ՀՀ սփիւռքի նախարարին ներկայացուց  քանի մը ծրագիր, որոնց իրականացման համար կ’ակնկալէ Հայաստանի կառավարութեան աջակցութիւնը: Այդ ծրագիրներէն է այնպիսի կազմակերպութեան ստեղծումը, որ հնարաւորութիւն կ’ունենայ իրականացնելու սփիւռքահայերու հիմնախնդիրներուն վերաբերող հարցերը, Հայրենիքի հետ գործակցութեան ծրագիրները եւ այլն:

ՀՀ սփիւռքի նախարար Հրանոյշ Յակոբեան ողջունեց Հովել Շնորհոքեանի` հայապահպանութեան ուղղուած քայլերը եւ առաջարկեց ուշադրութեան կեդրոնին մէջ պահել յատկապէս հայերու ու հայկական կազմակերպութիւններու հնարաւոր համախմբումը` պատրաստակամութիւն յայտնելով  հնարաւորութեան սահմանին մէջ աջակցելու այդ գաղափարներու իրականացումը: