Հոկտեմբերի 4-5-ին Չեխիայում և Սլովակիայում ՀՀ դեսպան Տիգրան Սեյրանյանն աշխատանքային այց կատարեց Սլովակիայի Հանրապետության մեծությամբ երկրորդ քաղաք Կոշիցե, հայտնում են ԱԳՆ մամուլի ծառայությունից:

Կոշիցեում ՀՀ դեսպանը հանդիպում ունեցավ քաղաքապետ, Սլովակիայի առողջապահության նախկին նախարար Ռիխարդ Ռաշիի և Սլովակիայի Ազգային խորհրդի, իշխող՝ սոցիալ-դեմոկրատական կուսակցության պատգամավոր Օտտո Բրիքսիի հետ:

Քաղաքապետի և պատգամավորի հետ հանդիպումների ընթացքում քննարկվել է Հայաստանի քաղաքներից մեկի հետ գործընկերական հարաբերություններ հաստատելու հարցը։ Սլովակյան կողմը պատրաստակամություն է հայտնել գործակցություն սկսել կոնկրետ նախագծերի շրջանակներում:

Պատգամավոր Բրիքսիի հետ քննարկվեցին նաև Սլովակիայի խորհրդարանում Հայաստանի հետ միջխորհրդարանական բարեկամության խումբ ստեղծելու և միջխորհրդարանական երկխոսությունն ակտիվացնելու հարցը։

Դեսպան Սեյրանյանն այցելեց Պավոլ Յոզեֆ Շաֆարիկի անվան համալսարան: ԲՈւՀ-ի ղեկավարության հետ հանդիպման ընթացքում քննարկվեցին Հայաստանի ԲՈւՀ-երի հետ բժշկության և բնական գիտությունների, մասնավորապես՝ աստղագիտության, բնագավառներում համագործակցություն սկսելու հնարավորությունները։

Դեսպան Սեյրանյանը նաև հանդես եկավ դասախոսությամբ ուսանողա-դասախոսական կազմի առջև, որի ընթացքում ներկայացրեց հայ-սլովակյան հարաբերությունների, Հայոց ցեղասպանության միջազգային ճանաչման, հայ-թուրքական հարաբերությունների, Լեռնային Ղարաբաղի հակամարտության և խաղաղ կարգավորման գործընթացի ներկա վիճակը։ Դեսպանը երախտագիտությամբ նշեց, որ Սլովակիայի խորհդարանն՝ Ազգային խորհուրդը ճանաչել և դատապարտել է Հայոց ցեղասպանությունը և քրեական օրենսգիրքը հավելել ցեղասպանությունների ժխտումը քրեականացնող հոդվածներով։

Այցի շրջանակներում Տիգրան Սեյրանյանը հանդիպեց նաև քաղաքի՝ շուրջ 30 ընտանիքից բաղկացած հայ համայնքի ներկայացուցիչների հետ:

2013թ.-ին Կոշիցեն ֆրանսիական Մարսելի հետ մեկտեղ հռչակվել էր Եվրոպայի մշակույթի մայրաքաղաք։ Բոլորովին վերջերս Եվրոպական հանձնաժողովը որոշում է կայացրել, որ քաղաքը կրելու է Եվրոպայի 2016 թվականի սպորտի մայրաքաղաքի տիտղոսը։