Հայաստան այցելող օտարերկրյա զբոսաշրջիկներին ավելի շատ հետաքրքրում են վանքերը, երեքշաբթի լրագրողներին ասաց «Շելբի տուր» (Shelby tour) ընկերության տնօրեն Մարինե Ավետիսյանը։

«Մենք պետք է աշխատենք, որ Հայաստանը հետաքրքիր լինի ոչ միայն իր մշակույթի տեսակետից, այլ նաև զբոսաշրջության ոլորտի նորամուծություններով», – նշեց Ավետիսյանը։

Նրա խոսքով` երիտասարդությանը, որպես կանոն, հետաքրքրում են էքստրեմալ զբոսաշրջությունը, քեմփինգները, ինչպես նաև` որսորդական, մարզական զբոսաշրջությունը։

Նա նաև նշեց, որ ոլորտի մասնագետների հիմնական խնդիրն է պատշաճ կերպով ներկայացնել երկիրը օտարերկրյա զբոսաշրջային շուկայում, բարձրացնել երկրի գրավչությունը բոլոր տարիքի զբոսաշրջիկների համար։

Ավետիսյանը նաև ասաց, որ վերջերս դրական միտում է նկատվում ինչպես ներգնա, այնպես էլ արտագնա զբոսաշրջության ոլորտում։ «Ներգնա զբոսաշրջության համատեքստում 2014թ.–ին մենք բավականին լավ ցուցանիշներ ենք գրանցել», – ավելացրեց Ավետիսյանը։

Խոսելով արտագնա զբոսաշրջության մասին` փորձագետը պարզաբանեց, որ Հայաստանի բնակիչների համար շարունակում են առաջնահերթ մնալ ինչպես դեպի Եվրոպա, այնպես էլ ԱՄԷ կազմակերպվող շրջագայությունները։ «Ձմռանը տարածված էին էկզոտիկ շրջագայությունները դեպի Թաիլանդ, Շրի Լանկա, Մալդիվներ», – ավելացրեց Ավետիսյանը։

Նա նշեց, որ և՛ ձմռանը, և՛ ամռանը հայ զբոսաշրջիկների մեծ մասը նախընտրում է այցելել հարևան Վրաստան, քանի որ այս ուղղությամբ գները, ամառային այլ զբոսաշրջային փաթեթների համեմատ, ավելի մատչելի են։

Էկոնոմիկայի նախարարության տվյալով` Հայաստան եկած զբոսաշրջիկների թիվը նախորդ տարվա համեմատ ավելացել է 11.3 տոկոսով և գերազանցել 1.2 միլիոնը։ Ներգնա զբոսաշրջության ոլորտում նույնպես էական աճ է գրանցվել. ցուցանիշը 2014 թվականին նախորդ տարվա համեմատ ավելացել է 28.4 տոկոսով և հասել 859 հազարի։