Հայաստանի կառավարութիւնը Դեկտեմբեր 4-ի իր նիստին հաստատած է 2013 թուականի Յունիս 25-ին ստորագրուած “ՀՀ-ի եւ ՌԴ-ի միջեւ ռազմատեխնիկական համագործակցութեան զարգացման մասին” պայմանագրի կիրառման կարգը:

Կառավարութեան մամուլի ծառայութեան հաղորդմամբ` պայմանագիրը կը ներառէ սպառազինութիւն, ռազմական սարքաւորում, աշխատանք, ծառայութիւն, մտաւոր գործունէութեան արդիւնք եւ ռազմատեխնիկական ոլորտի տեղեկատուութիւն մատակարարելու կարգը:

Գործադիրի հիմնաւորումով` Հայաստանը ռազմական եւ ռազմատեխնիկական համագործակցութիւն կ՛իրականացնէ Ռուսաստանի հետ, եւ այս որոշումը պիտի նպաստէ վերոնշեալ պայմանագիրով ստանձնած պարտաւորութիւններու կատարման մեքանիզմներու եւ մօտեցումներու մշակման:

Գիւմրի մէջ 1995-էն տեղակայուած է ռուսական 102-րդ ռազմակայանը, որ մարտական հերթապահութիւն կ՛իրականացնէ ԱՊՀ հակաօդային պաշտպանութեան միասնական համակարգի ծիրէն ներս: Ռազմակայանը ՌԴ Հիւսիսկովկասեան ռազմական շրջանի Անդրկովկասեան ռուսական զօրախումբի ենթակայութեան տակ է:

Ռազմակայանը զինուած է С-300 զենիթահրթիռային համալիրով եւ Միգ-29 կործանիչներով: Կայանի անձնակազմը շուրջ 5 հազար մարդ կը ներառէ:

2011 Ապրիլին Ազգային ժողովը վաւերացուց Հայաստանի մէջ ռուսական ռազմակայանի տեղակայման ժամկէտը 49 տարիով երկրարացնելու որոշումը: