Ն.Ս.Օ.Տ.Տ. Մեծի Տանն Կիլիկիոյ Արամ Ա Կաթողիկոս եւ Կոստանդնուպոլսոյ տիեզերական պատրիարք Նորին  մենասրբութիւն Բարդուղիմէոս Ա Յունաստանի Գիւմուլճինէ քաղաքի հայկական Սուրբ Գրիգոր եկեղեցւոյ հիմնադրման 180 ամեակին առիթով համատեղ պատարագ  մատուցած են:

Այս մասին կը հաղորդէ «Արմէնփրէս»-ը, վկայակոչելով «Ակօս» պարբերականը: Գիւմուլճինէի հայկական համայնքի ղեկավար Ստեփան Մաթեւոսեան քաղաքին մէջ բնակող շատ հայերու հետ դիմաւորած է Կաթողիկոսը եւ տիեզերական պատրիարքը: Վերջիններս պատարագէն առաջ կարճ ելոյթ  ունեցած են:

Արամ Առաջինը յայտնած է, որ Բարդուղիմէոսի հետ ծանօթ են աւելի քան 40 տարի: «Երիտասարդ տարիներուն սերտ համագործակցած ենք Եկեղեցիներու համաշխարհային խորհուրդի աշխատանքներու ժամանակ: Ժամանակի  ընթացքին  ան   դարձաւ   յոյներու   տիեզերական   պատրիարքը,   իսկ   ես   Կիլիկիոյ   կաթողիկոսը,
սակայն մենք պահպանեցինք մեր միջեւ առկայ բարեկամութեան եւ եղբայրութեան մթնոլորտը: Պատմութիւնն ալ  վկայ է, որ հայկական եւ յունական եկեղեցիներու միջեւ մշտապէս բարեկամական յարաբերութիւններ  եղած են»,-      յայտարարած     է   Արամ   Առաջինը`   նշելով,   որ  թէ’  ինքը,   թէ’   յոյներու   տիեզերական     պատրիարք
Բարդուղիմէոսը մշտապէս աշխատած են միասին երկու ժողովուրդներու եւ եկեղեցիներու միջեւ յարաբերութիւններն ամրապնդելու նպատակով:

Իր խօսքին մէջ Բարդուղիմէոս եւս խօսած է հայկական եւ յունական եկեղեցիներու միջեւ միջեկեղեցական երկխօսութիւնները շարունակելու պատրաստակամութեան մասին: