Մայր Աթոռ Սուրբ Էջմիածնից Հայրապետական Մեր օրհնութիւնն ենք բերում մեր ժողովրդին` ի Հայրենիս եւ ի Սփիւռս Անկախութեան տօնի առիթով:

Այսօր նուիրական օր է, մեր պետականութեան արժեւորման օր, մեր ձեռքբերումների գնահատման, մեր լուսաւոր ձգտումների, ապագայի հեռանկարների հաստատման օր:

Անկախ պետականութիւնը ազգերին եւ ժողովուրդներին հնարաւորութիւն է ընձեռում ապրելու իրենց արժէքներով, կերտելու իրենց իդէալները, ազատօրէն դրսեւորելու իրենց հոգեւոր ներուժն ու կարողութիւնները: Զօրացնենք մեր հոգիներում այս գիտակցութիւնն ու համոզումը եւ դարձնենք ուժ մեր Հայրենիքի շուրջ համախմբուած մնալու, ներկայ դժուարութիւնները յաղթահարելու եւ մեր երկիրը շէնացնելու համար, նաեւ ամրագրելու այն քրիստոնէական արժէքներն ու սկզբունքները, որոնցով ապրել ենք եւ ուզում ենք ապրել իբրեւ ազգ եւ հասարակութիւն:

Աղօթք ենք բարձրացնում առ Աստուած, որ օրհնի մեր Հայրենիքը, ամրացնի մեր պետականութիւնը, խաղաղ ու ապահով պահպանի մեր ժողովրդին ի սփիւռս աշխարհի: Առ Աստուած ապաւինութեամբ, մեր ջերմ սիրով եւ ամուր հաւատքով կառուցենք մեր նոր կեանքը ազատ մեր Հայրենիքի հովանու ներքոյ: