Մարտ 9-ին Աստանայի հայկական համայնքէն ներս մեծ հանդիսութեամբ նշուեցաւ Կանանց միջազ­գա­յին տօնը: Տօնական հանդիսութիւնը կազմակերպուած էր “Шашлычный двор” խորտկարանին մէջ, որուն հիւրընկալ տնօրէն Վա­լոդիկ Գարգրցեանն ամէն ինչ ըրած էր տօնը յիշարժան դարձնելու համար:

Հայ կանանց եւ աղջիկներուն առաջինը շնորհաւորեց Ղազախստանի Հանրապետութեան մէջ ՀՀ դեսպան պարոն Արա Սահակեան եւ իր ձեռքով կանանց ու աղջիկներուն տօնական Շամփէյն հիւ­րասիրեց: Շնորհաւորանքի եւ բարեմաղթանքի խօսք ըսաւ  նաեւ Աստանայի «Վան» հայկական մշակութային կեդրոնի ղեկավար Սահակ Սալումեան:

Էլ ի՜նչ տօն առանց հայկական երգ ու պարի: Հիւրընկալ տանտէրը հոգացած էր նաեւ այդ մասին: Հնչեց հայկական երաժշտութիւն, կանանց եւ աղջիկներուն գեղեցիկ վարդեր նուիրեցին, սեղան­նե­րուն փրփրեց հայկական շամփէյնը:  Կիրակնօրեայ դպրոցի սաներն ալ իրենց շնորհաւորանքը ներ­կայացուցին գրական-երաժշտական տեսքով. հնչեցին բանաստեղծութիւններ, սիրուած երգեր երե­խա­ներուն  եւ անոնց ծնողներուն կողմէ: Մեծ խորհուրդ կայ այն բանին մէջ, որ հայրենիքէն հազարաւոր քիլոմեթրեր հեռու հայկական համայնքը հերթական անգամ հաւաքուած էր` իրար հետ հաղոր­դակցուելու, ճաշակելու հայկական  համեղ ուտեստներ, հայավարի զուարճանալու, հայ զգալու եւ հայկական երգ ու պար վայելելու համար: Տօնը միայն առիթ էր: Նպատակը հայերով հաւաքուիլն ու մայրենի լեզուով շփուիլն էր:

Մայրենի լեզուն այսօր աւելի քան երբեք դարձած է հայապահպանութեան կարեւոր կռուան, եւ ուրեմն պէտք է սերտել այն, որքան ալ որ հայրենիքէն հեռու դժուար ըլլայ ատիկա: Եւ պատահական չէ, որ  երեկոյի ընթացքին հնչեցին  երգեր ոչ միայն մայրերու մասին,  այլեւ մայր հայրենիքի եւ մայ­րենի լեզուի: Հայկական ազգասիրական  երգեր կատարեցին  կիրակնօրեայ  սաներ Օֆելիա, Անոյշ, Արսինէ Կատուալեանները, Սոֆիա, Վարդուհի, Թագուհի Յովհաննիսեանները, Նիկօ Դեղոյեանն ու Գայեանէ Սարգսեանը, իսկ հաւաքուածները, մէկ  մարդու նման, ոգեւորուած կը ձայնակցէին:

Պարեցինք նաեւ մեր հայկական աւանդական «Քոչարին»:

Հրաշալի երեկոյ էր, որ մեզի հայ զգալու երջանիկ ակնթարթներ պարգեւեց:

-Օճախիդ  շէնութիւն,- կ’ըսէին ամէնը հիւրընկալ տանտիրոջը: – Շնորհակալութիւն հայաթաթաւ երեկոյի համար:

Հայաստան Մնէյեան

Աստանայի հայկական  կիրակնօրեայ  դպրոցի տնօրէն