Հայոց ցեղասպանութեան մասին պատմող հոլիվուտեան «Խոստումը» ֆիլմէն ստացուած շուրջ 20 միլիոն տոլարի հասոյթը պիտի ուղղուի Լոս Անճելըսի Քալիֆորնիոյ համալսարանի իրաւունքի դպրոցին մէջ նոր հիմնարկի ստեղծման: Ինչպէս կը հաղորդէ «Արմենփրես»-­ը, այս մասին կը յայտնէ Daily News-­ը:

«Մարդու իրաւունքներու «Խոստումը» հիմնարկը մեր իրաւունքի դպրոցն ու այս համալսարանը պիտի դարձնեն մարդու իրաւունքներու կրթութեան առաջամարտիկ»,­-  նշած է իրաւունքի դպրոցի տնօրէն Ճենիֆըր Լ. Մնուքին: Ան ընդգծած է, որ 20 միլիոն տոլարը ամենամեծ նուիրատուութիւնն է, որ իրաւունքի դպրոցը երբեւէ ստացած է հիմնարկը ստեղծելու համար:

«Շատ մարդոց Հայոց ցեղասպանութիւնը յայտնի չէ: 102 տարի մշտական ժխտման արշաւ եղած է: Մենք յուսով ենք, որ Հայոց ցեղասպանութեան հարցով առկայ մութը ցրուելով` կրնանք շարժուիլ առաջ եւ իսկապէս առաջատար ըլլալ մարդու իրաւունքներու հարցով կրթութեան, ուսումնասիրութիւններու, քարոզի եւ կրթաթոշակներու գործին մէջ»,­- նշած է «Խոստումը» ֆիլմի արտադրող, Քալիֆորնիոյ համալսարանի բժշկական դպրոցի մարսողական հիւանդութիւններու բաժնի համաղեկավար Էրիկ Էսրայէլեան:

Նոր հիմնարկին առաջին տնօրէնը պիտի ըլլայ իրաւունքի փրոֆէսոր Ասլի Պալին:

 «Հայերը միայն սեփական պատմութեան վրայ չեն կեդրոնացած: Մենք կը ցանկանք, որ մարդիկ մեր պատմութենէն դասեր քաղեն, որ միւսներն այդ գիտելիքներէ օգուտ ունենան»,­-նշած Էսրայէլեան:

 «Խոստումը» ֆիլմի համաշխարհային առաջին ցուցադրութիւնը տեղի պիտի ունենայ Ապրիլ 21-­ին: Հայաստանի կինոթատրոններուն մէջ ֆիլմը պիտի ցուցադրուի Ապրիլ 27-էն։­