Ուրբաթ 10 Փետրուար 2017-ին, Աթէնք ժամանեց Պուլկարիոյ Հ.Բ.Ը.Մ. Փլովտիւի mini ֆութպոլի խումբը:
Առաւօտեան, Փլովտիւի խումբը այցելեց Հ.Բ.Ը.Մ. Աթէնքի մասնաճիւղի կեդրոնի գրասենեակը եւ «Ա. Գալփաքեան» վարժարանը ուր խանդավառ մթնոլորտի մը մէջ, խումբի անդամները առիթը ունեցան ծանօթանալու Հ.Բ.Ը.Մ.-ի պաշտօնէութեան, ուսուցչական կազմին եւ աշակերտութեան:
Շաբաթ 11 Փետրուար 2017-ի, երեկոյեան տեղի ունեցաւ բարեկամական մրցամարտ Աթէնքի Մասիս եւ Փլովտիւի խումբերու միջեւ, ուր հաւասար հանդիսացան 6-6 հաշիւով: Խաղի աւարտին, Հ.Բ.Ը.Մ. Յունաստանի Կեդրոնական Յանձնաժողովի Ատենապետ՝ Դոկտ. Համբիկ-Սահակ Մարուքեան յուշատախտակ յանձնեց Պրն. Արտաշ Գիրմիրողլու-ին, իր տարիներու ընթացքին տարած անձնուրաց աշխատանքին միութեանս մարզական բաժնի համար: Ապա՝ Հ.Բ.Ը.Մ. Յունաստանի Կեդրոնական Յանձնաժողովի նախկին Ատենապետ՝ Պրն. Տիգրան Ապասեան յուշատախտակ յանձնեց ողբացեալ Յակոբ Աղազարեանի որդիներուն, Համբիկ եւ Լեւոն Աղազարեաններու, ի յիշատակ իրենց հօր, տարիներու ընթացքին տարած անձնուրաց աշխատանքին միութեանս մարզական բաժնի համար: Փլովտիւի խումբի անդամները, նոյն գիշերը ներկայ գտնուեցան Արարատ Մ.Մ.Մ. ճաշկերոյթին:
Կիրակի 12 Փետրուար 2017-ին, առաւօտեան խումբերու անդամները ներկայ գտնուեցան Փերիսթէրիի Ս. Աստուածածին եկեղեցւոյ պատարագին: Կէսօրին այցելեցին Արարատ Մ.Մ.Մ. ակումբը ուր իրենց դիմաւորեցին Ատենապետ՝ Պրն. Արիս Խաչատուրեան եւ վարչութեան անդամներ:
Այս յաջող շաբաթավերջի աւարտին, խումբերու պատասխանատուններ Լեւոն Աղազարեան (Աթէնք) եւ Հայկ Կարապետեան (Փլովտիւ) շեշտեցին այս ձեւի միջոցառումի կարեւորութիւնը, ամրապնդելու կապը Հ.Բ.Ը.Մ.-ի տարբեր մասնաճիւղերու միջեւ: