Յուլիս 4-ին ՀՀ սփիւռքի նախարարութեան մէջ նախարար Հրանոյշ Յակոբեանի ղեկավարութեամբ տեղի ունեցաւ գործակարգավարական խորհրդակցութիւն, որուն կը մասնակցէին նախարարի տեղակալներ Սերժ Սրապիոնեան եւ Վահագն Մելիքեան, աշխատակազմի ղեկավար Ֆիրդուս Զաքարեան, կառուցուածքային ստորաբաժանումներու, «Հայրենիք-Սփիւռք կեդրոն» ՊԱՈԿ-ի, «Իմ Հայաստան» փառատօնի, «Հայերն այսօր» ելեկտրոնային պարբերականի ղեկավարները:

Նախարարը յանձնարարեց առաւել հետեւողականօրէն իրականացնել «Արի տուն» եւ «Սփիւռք» ամառնային դպրոց ծրագիրները` կարեւոր համարելով մասնակիցներու անվտանգութեան, դասընթացներու պատշաճ կազմակերպման հետ կապուած հարցերը եւ ժամանակին բացայայտել եւ լուծել առկայ խնդիրները:

Կառուցուածքային ստորաբաժանումներու ղեկավարները ներկայացուցին շաբթուան ընթացքին նախարարութեան ծրագիրներու ծիրէն ներս   կատարած ընթացիկ աշխատանքները եւ յառաջիկայ ընելիքները:

Նախարարը կարեւոր համարեց յառաջիկայ շաբթուան ընթացքին նախատեսուած ձեռնարկներու պատշաճ կազմակերպումն ու ատոնց լուսաբանումը:

Տրուեցան նոր յանձնարարականներ, նշանակուեցան պատասխանատուներ ու համակարգողներ: