Հայաստանաբնակ եւ աշխարհասփիւռ հայերը «Դէպի Արցախ» խորագիրով 16-րդ ամենամեայ հեռուստամարաթոնի ժամանակ հանգանակեցին աւելի քան 22 միլիոն 661 հազար 371 տոլար: Լոս Անճելըսի մէջ տօնական տրամադրութեամբ ընթացաւ ու հայկական պարեղանակի հնչիւններու ներքոյ եզրափակուեցաւ «Հեռուստամարաթոն 2013»-ը:

Համահայկական դրամահաւաքի գլխաւոր նպատակը այս տարի Վարդենիս-Մարտակերտ` Հայաստան Արցախին կապող ռազմավարական, սոցիալ-տնտեսական կարեւոր նշանակութեան ճանապարհի կառուցումն է: «Արմէնփրէս»-ի հաղորդմամբ` Վարդենիս-Մարտակերտ ճանապարհի երկարութիւնը 116 քմ է, նոր ճանապարհի տակ պիտի տեղադրուին ջրահեռացման համակարգեր` անձրեի ջուրէն ճանապարհը պաշտպանելու համար: Վաթսուն թոն բեռնատարողոնակութեան համար նախատեսուած ճանապարհին մերձակայ լեռնալանջերը պիտի ամրացուին: Պիտի կառուցուին արտաքին եւ ներքին արգելապատնէշներ, մէկ կողմէն` ժայռի եւ ճանապարհի միջեւ` քարաթափելէն պաշտպանելու համար, միւս կողմէն` ճանապարհի եւ ձորերու միջեւ: Ճանապարհի երկայնքով կը գտնուի 30 գիւղ, պիտի կառուցուին ճանապարհային 16 կամուրջներ:

Մինչ հեռուստամարաթոն իրականացուած դրամահաւաք-ճաշկերոյթներուն, հեռախօսամարաթոններուն, փոստային հանգանակութիւններուն միջոցով հաւաքուած գումարներն ալ կ’ուղղուին գիւղատնտեսական ծրագիրներու ընդլայնման Հայաստանի Տաւուշի մարզին մէջ, համայնքային կեդրոններու կառուցման Լեռնային Ղարաբաղի, Վարդենիս-Մարտակերտ ճանապարհի, ինչպէս նաեւ Սուրիոյ մէջ հայկական դպրոցներու կառուցման:

Նախորդ տարի «Հայաստան» Համահայկական հիմնադրամի «Մեր գիւղը» կարգախօսով 15-րդ հեռուստամարաթոնի աւելի քան 12 ժամ տեւած հանգանակութեան արդիւնքով հաւաքուած էր 21 միլիոն 422 հազար 477 տոլար` մօտ 8.5 մլրդ դրամ:

http://armenpress.am