Ֆրանսական ամսագիրը ծաւալուն յօդուածով անդրադարձած է Հայոց ցեղասպանութեան թեմային

Ֆրանսական հեղինակաւոր «Le Figaro» պարբերականի «Histoire» ամսագիրի ապրիլեան համարին մէջ հրապարակուած է Հայոց ցեղասպանութեան նուիրուած ծաւալուն յօդուած մը: Այս մասին կը յայտնեն ԱԳՆ մամլոյ ծառայութենէն:

«Հայաստան. մոռցուած ցեղասպանութիւն» վերնագիրով յօդուածը, որ հեղինակած է ֆրանսահայ պատմաբան Միքայէլ Նիշանեան, մանրամասնօրէն կը ներկայացնէ Օսմանեան կայսրութեան մէջ հայերու ցեղասպանութեան ժամանակագրութիւնը, ատոր նախորդող համիտեան ջարդերը եւ ցեղասպանութեան հիմքին մէջ ինկած թուրք ազգայնական գաղափարախօսութեան յառաջխաղացումը: Յօդուածի «Մէկդարեայ ժխտողականութիւն» բաժինին մէջ առանձին անդրադարձ կը կատարուի Հայոց ցեղասպանութեան յաջորդած եւ ներկայիս շարունակուող թրքական իշխանութիւններու ժխտողականութեան քաղաքականութեան` իբրեւ ատոր ցայտուն օրինակ նշելով Կալիպոլիի ճակատամարտի հարիւրամեակի օրուան փոփոխութիւնը, որ սակայն, ըստ հեղինակին, հակառակ թուրք ղեկավարութեան սպասելիքներուն, արդիւնք չտուաւ միջազգային հանրութեան ուշադրութիւնը շեղելու հարցին մէջ: Ամսագիրի էջերուն վրայ զուգահեռաբար ներկայացուած են Ֆրանսայի մէջ վերջին ամիսներուն Հայոց ցեղասպանութեան թեմայով հրատարակուած բազմաթիւ աշխատութիւնները եւ Ապրիլին կայանալիք խոշոր ցուցադրութիւնները:

 

Scroll Up