««Հայորդաց տան» պէս կրթօճախ դեռ չէի տեսած»․ Մխիթար Քեթցեան

Աշուղ Մխիթար Քեթցեան` Մոսկուա կատարած այցելութեան ծիրէն ներս հանդիպած էր ՀԱԵ Ռուսաստանի եւ Նոր Նախիջեւանի Հայոց Թեմի առաջնորդ Եզրաս արքեպիսկոպոս Ներսիսեանի հետ, ստացած  Սրբազանի օրհնութիւնը եւ «Հայորդաց տան» տնօրէն Հմայեակ Գէորգեանի ուղեկցութեամբ հիւրընկալուած էր կրթօճախին մէջ: Այս մասին «Հայերն այսօրին» կը տեղեկացնէ Արմինէ Կարէյեան:

Հիւրընկալութեան ընթացքին Մխիթար Քեթցեան ներկայ եղաւ «Մուսալերան հերոսամարտը» խորագիրով ձեռնարկին, հանդիպեցաւ «Ակունք» համոյթի երաժիշտներուն հետ:

«Պէտք է ըսեմ, որ անչափ տպաւորուած եմ: Պատկերացում անգամ չունէի նման կրթօճախի գոյութեան մասին: Համերգային շրջագայութիւններու ընթացքին բազմիցս եղած եմ Սփիւռքի դպրոցներու մէջ, բայց «Հայորդաց տան» պէս կրթօճախ դեռ չէի տեսած: Այստեղ կատարուած ահռելի աշխատանքով հիացած ու ապշած եմ պարզապէս:  Հիացմունքի խօսքերը բաւական չեն նկարագրելու «Հայորդաց տան» անձնակազմի կատարած աշխատանքն ու ատոր նշանակութիւնը: Այս կարճ ժամանակահատուածին մէջ ես տեսայ եւ համոզուեցայ, որ անոնք պարզապէս ջանք ու եռանդ չեն խնայեր հայապահպանման գործին մէջ, որ Ռուսաստանի մէջ անչափ կարեւոր է, քանի որ այն այնքան ալ Սփիւռք չի դիտարկուիր, իսկ ատիկա կը թուլացնէ ձուլման վտանգի զգացողութիւնը»,- հանդիպումներէն յետոյ մեզի հետ զրոյցին ըսաւ Մխիթար Քեթցեան եւ համոզում յայտնեց, որ «Հայորդաց տան» սաներուն մէջ կան տաղանդաւոր հայորդիներ, որոնք ժողովրդական երգի անբիծ փոխանցողները կրնան դառնալ:

մոսկվա մոսկվա1

Scroll Up