Հայ դաշնակահարուհի Նարէ Արղամանեանը աշխարհահռչակ երգիչ Շառլ Ազնաւուրի հրաւէրով յաջորդ տարի համերգներ պիտի ունենայ Ժնեւի մէջ: Տաղանդաւոր դաշնակահարուհին 2015 թուական Փետրուար 5-ին ելոյթ պիտի ունենայ Ժնեւի ՄԱԿ-ի գրասենեակին մէջ: “Մեծամասամբ հայկական ստեղծագործութիւններ եմ կատարելու եւ այնպիսի գործեր, որոնք ցեղասպանութեան թեմային են առնչւում: Շառլ Ազնաւուրը եւս ներկայ կը լինի այդ համերգին”,-ըստ “Արմէնփրես”- ի՝ տեղեկացուցած է Նարէ Արղամանեանը:

Հայոց ցեղասպանութեան 100֊րդ տարելիցին ընդառաջ դաշնակահարուհին ելոյթներ պիտի ունենայ նաեւ այլ երկիրներու մէջ:

Արղամանեանը Ցեղասպանութեան նուիրուած քանի մը համերգներ տուած է Զուիցերիոյ կարգ մը քաղաքներու մէջ:

“Վերջին շրջանում զգացել եմ, որ բաւականին հետաքրքրութեամբ են ընդունում հայկական երաժշտութիւնը եւ հայ կոմպոզիտորներին: Այլ երկրներում յաճախ եմ սկսել կատարել Խաչատրեանի ստեղծագործութիւններից` մանաւանդ Դաշնամուրի կոնցերտը: Այս համերգաշրջանում մօտ 7֊8 անգամ միայն Խաչատրեանի կոնցերտն եմ նուագել տարբեր նուագախմբերի հետ: Եւրոպացիներից շատերը յուզւում են հայկական երաժշտութիւն լսելիս, շատերը, որ ընդհանրապէս չէին լսել, մօտենում էին եւ ասում, որ նման երաժշտութիւն երբեւէ չեն լսել”,-նշած է դաշնակահարուհին:

Նարէ Արղամանեանը աւելցուցած է նաեւ, որ յաջորդ տարի Վիեննայի մէջ պիտի կազմակերպուի ցեղասպանութեան տարելիցին նուիրուած համերգ, որուն դաշնակահարուհին հանդէս պիտի գայ ջութակահար Սերկէյ Խաչատրեանի, թաւջութակահար Նարեկ Հախնազարեանի, երգչուհի Յասմիկ Պապեանի հետ: Նոյն համերգը պիտի կազմակերպուի նաեւ Պրահայի մէջ:

Դաշնակահարուհի Նարէ Արղամանեանը ծնած է 1989 թուականին եւ սկսած դաշնամուր նուագել 5 տարեկանէն: Յաճախած է Երեւանի Չայկովսկիի անուան երաժշտական դպրոցը: 2004 թուականին 15 տարեկանին դարձած է Վիեննայի երաժշտութեան եւ արուեստներու համալսարանի ամենաերիտասարդ սաներէն մէկը: Հանդէս եկած է բազմաթիւ յայտնի նուագախումբերու հետ, բազմաթիւ մրցոյթներու դափնեկիր է: