«Save the children» Հասարակական, Միջազգային Կազմակերպութեան Տնօրէնը ՀՀ Սփիւռքի Նախարարին Ներկայացուց Սուրիահայերու Օգնութեան Իրենց Նոր Ծրագիրը

Նոյեմբեր 21-ին ՀՀ սփիւռքի նախարար Հրանոյշ Յակոբեան ընդունեց «Save the children» միջազգային հասարակական կազմակերպութեան տնօրէն Արսէն Ստեփանեանը եւ կազմակերպութեան «Փախստականներու ներուժի զարգացում եւ կենսամակարդակի բարելաւում» ծրագիրի համակարգող Թամարա Պարպակաձէն:

1993թ. Հայաստանի մէջ գրասենեակ հիմնադրած եւ աշխարհի աւելի քան 120 երկիրներու մէջ ներկայացուած «Save the children» կազմակերպութիւնը իրականացուցած է աւելի քան 60 միլիոն ԱՄՆ տոլար արժողութեամբ ծրագիրներ երեխաներու պաշտպանութեան, կրթութեան, առողջապահութեան եւ սոցիալական ոլորտներուն մէջ:

Կազմակերպութիւնը  2013թ. հովանաւորած է 60 սուրիահայ երեխայի մասնակցութիւնը գեղարուեստական խմբակներու, «Սուրիահայերու հիմնախնդիրները համակարգող կեդրոն» ՀԿ-ի, UNICEF եւ «World Vision» կազմակերպութիւններու հետ ստորագրած յուշագիրով մասնակցած է «Սուրիահայ երեխաներու հոգեբանասոցիալական բարեկեցութեան աջակցութեան ծրագիրի» իրականացման, որուն ծիրէն ներս  հովանաւորած է 9-14 տարեկան 80 երեխայի ամառնային երկշաբաթեայ հանգիստը Աղաւնաձորի «Արի տուն» ճամբարին մէջ:

Կազմակերպութեան տնօրէն Արսէն Ստեփանեան նախարարին ներկայացուց «Փախստականներու ներուժի զարգացում եւ կենսամակարդակի բարելաւում» սուրիահայերու աջակցութեան նոր ծրագիրը, որուն նպատակն է Հայաստան տեղափոխուած սուրիահայերուն առջեւ ծառացած խնդիրներուն արձագանքելը եւ լուծումներ առաջարկելը:

Ծրագիրը մեկնարկած է 2014թ. Սեպտեմբերին եւ կ’իրականացուի Երեւանի մէջ ու մօտակայ մարզերուն մէջ: Այն պիտի նպաստէ սուրիահայերու բարեկեցութեան` խթանելով անոնց հմտութիւններու կիրառման, ներուժի զարգացման, ընդելուզման ու աշխոյժ մասնակցութեան հասարակական կեանքին:

Արսէն Ստեփանեան նշեց, որ ծրագիրի ծիրէն ներս կը նախատեսեն կազմակերպել մասնագիտական դասընթացներ կանանց եւ յատուկ ձեռնարկներ`
երեխաներու համար:

ՀՀ սփիւռքի նախարարն արժեւորեց սուրիահայերու համար աշխատանքային շուկային մէջ պահանջարկ ունեցող հմտութիւններու զարգացմանը միտուած ծրագիրներու իրականացումը:

Գերատեսչութեան ղեկավարը  նշեց, որ ծրագիրներ կազմելուն եւ՛ պետական, եւ մասնաւո՛ր կազմակերպութիւնները պէտք է առաջնորդուին հիմնարար մէկ սկզբունքով, թէ որքան  հիմնաւոր եւ էական է Սուրիոյ քաղաքացիական պատերազմէն տուժած մեր հայրենակիցներուն տրամադրուող այս կամ այն օգնութիւնը,  նախատեսուած գումարները արդեօք արդիւնաւէտ կը ծառայեն ճիշդ նպատակին եւ կ’օգնեն սուրիահայերուն ոտքի կանգնելու Հայրենիքի մէջ:

Նախարար Հրանոյշ Յակոբեան աւելցուց, որ ՀՀ սփիւռքի նախարարութիւնը պատրաստ է աջակցելու բոլոր նմանօրինակ նախաձեռնութիւններու եւ ծրագիրներու:

Երկուստեք կարեւոր համարուեցան ծրագիրներու հանրայնացմանը վերաբերող հարցերը:

Scroll Up