ՀՀ Սփիւռքի Նախարար Հրանոյշ Յակոբեան Ընդունեց ԱՄՆ-ի Լուիզիանա Նահանգի Հայ-Ամերիկեան Խորհուրդի Ատենապետ Վազգէն Կալթակճեանը

Յունիս 4-ին ՀՀ սփիւռքի նախարար Հրանոյշ Յակոբեան ընդունեց ԱՄՆ-ի Լուիզիանա նահանգի Հայ-ամերիկեան խորհուրդի ատենապետ, Սոցիալ Դեմոկրատ Հնչակեան կուսակցութեան կեդրոնական վարչութեան անդամ Վազգէն Կալթակճեանը, որուն ջանքերով Արցախի անկախութիւնը ճանաչող բանաձեւը մուտք  գործած է Լուիզիանայի նահանգային Սենատ:

Իր ողջոյնի խօսքին մէջ նախարար Հ. Յակոբեան շնորհակալութիւն յայտնեց Վազգէն Կալթակճեանին եւ Լուիզիանա ապրող այն 100 հայ ընտանիքներուն, որոնք թէեւ փոքր համայնք են, սակայն աշխուժօրէն կը մասնակցին նահանգի հասարակական-քաղաքական կեանքին:

ԼՂՀ անկախութեան ճանաչման բանաձեւը Լուիզիանայի հայ համայնքի առաջարկութեամբ եւ տարած աշխատանքներու շնորհիւ մայիս 30-ին դրուած է քուէարկութեան: Չնայած թրքական կողմի ճնշումներուն` քուէարկութիւնը կայացած է եւ  բանաձեւը յաջողութեամբ ընդունուած: Լուիզիանան ԱՄՆ-ի 4-րդ նահանգն է, որ նահանգային Սենատի կողմէ ԼՂՀ անկախութեան ճանաչման վերաբերեալ բանաձեւ  ընդունած է:

Scroll Up