«Արի Տուն» Ծրագիրի 6-րդ Փուլին Կը Մասնակցին 48 Հայեր Տիարպեքիրէն

Օգոստոս 4-ին տեղի ունեցաւ ՀՀ սփիւռքի նախարարութեան հայրենաճանաչութեան «Արի տուն» ծրագիրի 6-րդ փուլի բացման արարողութիւնը, որուն կը մասնակցէր աշխարհի 15 երկրէ 182 մասնակից, մէջը ըլլալով` 48 մասնակից Թուրքիայէն:

Ողջունելով ծրագիրի մասնակիցները ՀՀ սփիւռքի նախարարի տեղակալ Սերժ Սրապիոնեան նշեց. «Հայրենիքն իր թեւերը լայնօրէն բացել է ձեր առաջ: Համոզուած եմ, որ այս ընթացքում ձեր մէջ կ’արթնանայ պատմական անբարենպաստ դէպքերի ազդեցութեամբ նիրհած հայրենասիրական գենը»:

Նախարարի տեղակալն ուրախութեամբ յայտնեց, որ 6-րդ փուլին կը մասնակցին մեր պատմական մայրաքաղաքէն` Տիարպեքիր վերանուանուած Տիգրանակերտէն ժամանած իսլամացած հայեր:

«Մեր հայրենակիցների այցը Հայրենիք, հայկական իրականութիւնը ճանաչելու ամենաճիշտ եւ ամենաուղիղ ճանապարհն է: Յուսանք, որ այսուհետ Հայաստան-Տիարպեքիր կապն անխափան կը լինի, – նշեց Ս.Սրապիոնեան` աւելցնելով, -Տիարպեքիրում ապրող հայութեանն իրենց արմատներին ծանօթացնելու անգնահատելի ջանքերի, ինչպէս նաեւ նրանց այցը Հայաստան կազմակերպելու համար շնորհակալ ենք քանատահայ ինժեներ, բարերար Րաֆֆի Պետրոսեանին, ով նաեւ անցեալ տարի նախաձեռնեց եւ իրականութիւն դարձրեց Տիարպեքիրի Սուրբ Կիրակոս եկեղեցու վերակառուցումը»:

Իր հերթին շնորհակալութիւն յայտնելով ՀՀ սփիւռքի նախարարութեան պատմական Տիգրանակերտի հայութեան այցը Հայրենիք կազմակերպելու համար` Րաֆֆի Պետրոսեան նշեց. «Սուրբ Կիրակոս եկեղեցւոյ վերականգնումը կարծես մագնիս եղաւ այնտեղի հայութեան համար` սեփական արմատներուն վերադառնալու, ազգային ինքնութիւնը վերագտնելու գործին մէջ»:

Այնուհետեւ խօսեցաւ Տիարպեքիրէն ժամանած խումբի ղեկավար Գաֆուր Թուրքայը (Օհաննէս Օհանեան): «Շնորհակալ ենք մեզի այսպէս ջերմօրէն հիւընկալելու համար: Մենք յուզուած ենք` այսքան հայութիւն մէկ տեղ միախմբուած տեսնելով: 99 տարի Տիարպեքիրի մէջ կեանքը կարծես կանգ առած ըլլար, 99 տարի անց մեր ձեռքերու շղթաներն այլեւս արձակուած են: Հայոց Ցեղասպանութենէն մազապուրծ հայերէն շատերը ապաստանեցան եւրոպական, ամերիկեան, արաբական երկիրներ: Բայց ամէնէն դժուարը մեզի համար էր` մնալ Արեւմտեան Հայաստանի մէջ, մեր հողին վրայ` կորսնցնելով մեր անունն ու ազգանունը, մեր կրօնը: Շատ ուրախ ենք, որ այսօր Տիգրանակերտի մէջ արմատներուն վերադառնալու մեծ շարժում սկսած է, – նշեց Գաֆուր Թուրքայը` աւելցնելով, որ Գաֆուրն իր թրքական անունն է, եւ ինքը միայն վերջերս  վերադարձած է քրիստոնէական արմատներուն` վերագտնելով իր  հայկական ազգանունը` Օհանեան:

Մասնակիցը նշեց նաեւ, որ բարերար Րաֆֆի Պետրոսեանի նախաձեռնութեամբ Տիարպեքիրի  մէջ 2013թ. առաջին անգամ կազմակերպուեցան հայերէն լեզուի ուսուցման դասընթացքներ: Այնուհետեւ ՀՀ սփիւռքի նախարարութեան ուղղուած շնորհակալական խօսքով հանդէս եկաւ ԱՄՆ-էն ժամանած Նիւ Եորքի հայ համայնքի ղեկավար, «Անմիջական օգնութիւն հայերուն» բարեգործական միութեան հիմնադիր տնօրէն Սուետլանա Ամիրխանեան, որու  նախաձեռնութեամբ 13 երիտասարդ կը մասնակցին «Արի տուն» ծրագիրին: Սուետլանա Ամիրխանեան նշեց, որ Նիւ Եորք բնակող հայերէն շատերը նոյնպէս Ցեղասպանութենէն եւ Պաքուի ջարդերէն մազապուրծ հայերու սերունդներն են, որոնք կորսնցուցած էին իրենց հայկական ազգանունները եւ միայն վերջերս վերագտան ու փոխեցին ազգանուններու վերջաւորութիւնը`  վերականգնելով   եան մասնիկը:

Մասնակիցներուն հայկական պարերով ողջունեց «Մարգարիտներ» աւանդական երգի-պարի համոյթը, որ վերջերս  վերադարձած էր Արեւմտեան Հայաստանէն: Ձեռնարկին աւարտին «Մարգարիտներ» համոյթին միացան նաեւ Տիարպեքիրէն եկած հայերը, ինչպէս նաեւ ծրագիրի միւս մասնակիցները եւ միասին հայկական պար պարեցին:

«Արի տուն» ծրագիրի 6-րդ փուլի մասնակիցները հանդիսաւոր բացումէն անմիջապէս ետք այցելեցին Երեւանի Պատմութեան թանգարան եւ Օշական` ծաղիկներ դնելու Սուրբ Մեսրոպ Մաշտոցի շիրիմին:

Scroll Up