«Արի Տուն-2014». «Հայրենիք Վերադառնալու Միտքով Կ’ապրինք Ուքրանիոյ Մէջ…». Անի Եւ Աննա Ոսկանեաններ

Անին եւ Աննան Ուքրանիոյ Պոլտաւա քաղաքէն  եկած են մասնակցելու ՀՀ սփիւռքի նախարարութեան Սփիւռքի երիտասարդներու հայրենաճանաչութեան «Արի տուն-2014» ծրագիրին: Այնտեղ քոյրերը իրենց օրը կ’անցնեն հայկական տարբեր գիրքեր կարդալով, իսկ հայ մշակոյթի մասին կը փորձեն համացանցի միջոցով տեղեկանալ կամ ծնողներուն կը դիմեն: Անոնք հայկական դպրոց կը յաճախեն:

Դպրոցին մէջ հայրենիքի թեմայով յաճախ  ձեռնարկներ կը կազմակերպեն, որուն ընթացքին Անին ելոյթներ կ’ունենայ` հանդիսատեսին պատմելով Էջմիածինի, քրիստոնէութեան ընդունման եւ այլնի մասին: Պոլտաւայի մէջ նաեւ հայկական ակումբ կը գործէ, ուր բոլոր տօներուն` Ամանոր, Սուրբ Զատիկ, Մայրութեան եւ Գեղեցկութեան տօն եւ այլն, կը հաւաքուին Ուքրանիոյ տարբեր հայ համայնքներու բնակիչներ եւ ուրախ մթնոլորտի մէջ կը նշեն այդ օրը: Քոյրերուն համար յատկապէս սպասելի է «Հայկական խոհանոցի օր» ձեռնարկը, երբ բոլորը հայկական զանազան ճաշատեսակներ կը պատրաստեն եւ կը հիւրասիրեն հրաւիրուած հայ եւ օտար հիւրերուն: Աղջիկները մայրիկի օգնութեամբ տոլմա, լաւաշ, Ղարաբաղի ժինգեալով հաց կը պատրաստեն:

Անին եւ Աննան «Արի տուն» ծրագիրին մասին իրազեկուած են հեռուստացոյցի միջոցով: Ապա անոնց հայրը յորդորած է երթալ Հայաստան եւ մասնակցիլ այս գեղեցիկ ծրագիրին: Անոնց բոլոր սպասումները արդարացած են. Կ’ըսեն` ինչ պատկերացուցած էինք, այդ ալ տեսանք: Շատ կարճ ժամանակուան մէջ հասցուցած են ընկերանալ մասնակից երկիրներու երեխաներուն հետ: Անոնցմէ են Չեխիոյ, Սուրիոյ, Կիպրոսի, Ղազախստանի մասնակիցները: Միասին տարբեր երգեր եւ բանաստեղծութիւններ կը սորվին,կը խօսին իրենց հետքրքրութիւններուն մասին:

Քոյրերը շատ անգամ եկած են Հայաստան, հայրենիք վերադառնալու միտքով կ’ապրին Ուքրանիոյ մէջ, քանի որ այստեղ իրենց լաւ կը զգան:  Անին եւ Աննան շատ կը սիրեն երեկոյեան Երեւանը, երբ լոյսերու ներքոյ կը զբօսնեն փողոցներով, կը սիրեն  Հանրապետութեան հրապարակ այցելել ու հիանալ շատրուաններու գեղեցիկ «պարով»: Միայն քիչ մը կը նեղուին Հայաստանի տաք ամառէն:

Գէորգ Չիչեան

Scroll Up