Վարպետութեան Դասերն Իբրեւ Փառատօնային Նորոյթ

«Իմ Հայաստան» փառատօնը ոչ միայն սփիւռքեան գեղարուեստական ինքնագործունէութեան ստուգատես է, այլեւ` ինքնատիպ դպրոց ու փորձարան բոլոր մասնակիցներուն համար: Յայտնի է, որ սփիւռքեան ոչ բոլոր համայնքները ունին գեղարուեստական ինքնագործունէութեան արհեստավարժ մանկավարժներ, ոչ բոլոր համայնքները հնարաւորութիւն ունին Հայաստանէն հրաւիրելու մասնագէտներ, մինչդեռ երգելու եւ պարելու ցանկութիւնը բոլորին մօտ մեծ է: Եւ բազմաթիւ համոյթներ կը ստեղծուին ոչ այնքան արհեստավարժ մղումներով, որքան` սիրով, մասնակիցներու մէջ կուտակուած ձգտումներու բացայայտման անհրաժեշտութեամբ:

Իսկ փառատօնը, ահա, միջոց է` օգնելու մասնակիցներուն վարպետութեան կարճաժամկէտ դասեր առնելու, մասնագիտական խորհուրդներ լսելու: Այս առումով Սփիւռքի նախարարութիւնը համագործակցութիւն ձեւաւորած է Երեւանի Խաչատուր Աբովեանի անուան պետական մանկավարժական համալսարանի Մշակոյթի բաժանմունքի պարարուեստի ամպիոնին հետ, որ կը ղեկավարէ մանկավարժական գիտութիւններու թեկնածու, ՀՀ մշակոյթի վաստակաւոր գործիչ Կարէն Գէորգեան: Ան ամպիոնի դասախօսներուն հետ մշակած է հետաքրքիր մեթոտական ծրագիրներ, որոնց կիրառմամբ հնարաւոր կը դառնայ Սփիւռքէն եկած պարախումբերուն ծանօթացնելու ազգային պարի առանձնայատկութիւններուն, ազգային պարին մէջ կիրառուող տարրերուն, ազգագրական եւ ժողովրդական պարերու առանձնաձեւերուն:

Այս օրերուն համալսարանի պարարուեստի ամպիոնի փորձասենեակներուն մէջ աշխոյժ մթնոլորտ է, եռուզեռ: Վարպետութեան դասերու մասնակիցները ոգեւորուած են, որովհետեւ առիթ ունին լսելու մասնագիտական խորհուրդներ, աշխատելու հմուտ պարուսոյցներու հետ: Այս երաշխիք է, որ վերադառնալով իրենց համայնքներ, գեղարուեստական ինքնագործունէութեան մասնակիցները իրենց բեմադրութիւններուն պիտի կիրառեն այստեղ սորված տարրերը, պիտի պահպանեն ազգային առանձնայատկութիւնները, քանի որ յատկապէս վերջին տարիներուն մասնաւորաբար Սփիւռքի մէջ աղաւաղուած են պատկերացումները ազգային պարի մասին, օտարահունչ տարրերը թափանցելով մեր պարերուն մէջ` այլափոխած են ատոնք, զրկած իրենց նախնականութենէն եւ իւրայատկութենէն:

Սփիւռքի նախարարութեան մշակութային ծրագիրներն, ուրեմն, օրաւուր ձեռք կը բերեն նոր բովանդակային արժէք եւ նպատակասլացութիւն, ուսուցումն ու ճանաչողականութիւնը կը դառնան այդ ծրագիրներու առանցքները: Այս ամէնը եւս նպատակամղուած են հայեցիութեան ու ազգապահպանման, մեր նկարագիրի անաղարտութեան:

Լ.Մ.

Scroll Up