Ամերիկաբնակ Արձակագիր Մարգարիտ Դերանցը Կը Ներկայացնէ Իր Նոր Ժողովածուն

«Զանգակ» գրատան մէջ մայիս 14-ին տեղի պիտի ունենայ ամերիկաբնակ արձակագիր Մարգարիտ Դերանցի «Քրտնաձուկ» գիրքի շնորհանդէսը: Բանախօսութեամբ հանդէս կու գան գրականագէտ Անի Փաշայեան եւ Պահպանողական կուսակցութեան նախագահ, բ.գ.դ. Միքայէլ Հայրապետեան: Գիրքը «Քրտնաձուկ»  վերնագրուած է ժողովածոյին մէջ ընդգրկուած պատմուածքներէն մէկուն վերնագիրով, ուր կը ներկայացուի ԱՄՆ-ի մէջ բանտարկուած  աղջկայ մը պատմութիւնը: Ի դէպ, «Քրտնաձուկ» կը  կոչուի նաեւ ամերիկեան հնդիկներու աղօթատունը:

Մարգարիտ Դերանցի 16 նոր պատմուածքներէն բաղկացած ժողովածուն կը նախանշէ թեմատիկ նոր տարածութիւններ եւ կը ներկայացնէ ոչ հայկական գեղարուեստական իրականութիւն: Հեղինակն իրեն բնորոշ հոգեբանական նուրբ լուծումներով կը պատկերէ մարդկային զգացումներու եւ յարաբերութիւններու  ամբողջ պատկերասրահ մը, ուր սկզբունք պահպանելը կը դառնայ գերագոյն մարտահրաւէր:

«Ասիկա, ընդհանուր առմամբ, իմ հինգերորդ աշխատանքս է: Այս գիրքը գրելու համար յատուկ շարժառիթ չկար, ես չեմ կրնար չստեղծագործել, նոր պատմութիւններ կային կուտակուած, որոնք անպայման պէտք է յանձնէի ընթերցողի ուշադրութեան: Գիրքը հրատարակեցի «Անտարես» հրատարակչութեան գլխաւոր խմբագիր Արքմենիկ Նիկողոսեանի խորհուրդով եւ նախաձեռնութեամբ»,-«Հայերն այսօր»-ի հետ զրոյցին ըսաւ Մարգարիտ Դերանց` աւելցնելով, որ գիրքն «Անտարես» ընդգրկած է իր` 21-րդ դարու մատենաշարին մէջ:

«Ընթերցողներու շարքին երիտասարդներու մեծ բանակ կայ, որոնք, կարծես, կ՛արդիականացնեն իմ գրականութիւնս: Միշտ շոյուած կը զգամ  իրենցմով: Առհասարակ, ես միշտ կը փորձեմ ոգեշնչել ընթերցողներս եւ կը յորդորեմ, որ երբեք չկորսնցնեն երազելու յատկութիւնը, որովհետեւ երազանքին հետապնդող մարդն աւելի հզօր ուժ կը ներկայացնէ: Պէտք չէ վախնալ երազելէն, քանի որ բոլոր յաջողակ մարդիկ նախկին անյաջողակներն են, որոնք իրենց պայքարի ճանապարհին երբեք չեն յանձնուած»,-զրոյցն ամփոփեց Մարգարիտ Դերանց:

Scroll Up