Բացուած է Երեւանի 2800-ամեակի Այգին

Վարչապետ Նիկոլ Փաշինեան այսօր մասնակցած է Երեւանի 2800-ամեակի այգիի հանդիսաւոր բացման արարողութեան:

Ձեռնարկին կը մասնակցէին ՀՀ կառավարութեան անդամներ, Երեւանի քաղաքապետը, պաշտօնատար այլ անձիք, բազմաթիւ քաղաքացիներ: Այգին կառուցուած է «Վարդանեան ընտանիք» բարեգործական հիմնադրամին կողմէ` Միքայէլ եւ Կարէն Վարդանեաններու ֆինանսաւորմամբ:

Ինչպէս «Հայերն այսօր»-ին կը յայտնեն ՀՀ վարչապետի մամլոյ ծառայութենէն, վարչապետ Նիկոլ Փաշինեան շրջայց  կատարած է այգիին մէջ, ծանօթացած աշխատանքներու արդիւնքներուն եւ քաղաքացիներուն համար ստեղծուած պայմաններուն:

Այգիի նախագիծի հեղինակ Կարէն Վարդանեան ներկայացուցած է կատարուած աշխատանքները. ան նշած է, որ շինարարական աշխատանքներն իրականացուած են 1.5 տարուան մէջ, այգիին մէջ փոխուած է ամէն ինչ: Տնկուած են բացառիկ ծառատեսակի ծառեր, տեղադրուած է շուրջօրեայ կաթիլային եւ ցնցուղային ինքնագործող ոռոգման համակարգ: Այգիի կեդրոնական հատուածին մէջ տեղադրուած է Երեւանի քարտէզը, կառուցուած է Երեւանի քարտէզի տեսքով փորագիր հրապարակ: Տեղադրուած են շատրուաններ, հին հայկական գորգերու զարդանախշերով սալայատակ, պրոնզաձոյլ արձաններ, նստարաններ, աղբամաններ եւ լուսասիւներ:

* * *

Երեւանի 2800-ամեակի այգին կը հանդիսանայ Երեւան համայնքի սեփականութիւնը, եւ այգիի տարածքին մէջ կ՛արգիլուի որեւէ ձեռնարկատիրական գործունէութիւն: Բացի կառուցապատումէն, հիմնադրամը, 2019 թ. սկսած, 99 տարի իր միջոցներու հաշուին պիտի հոգայ նաեւ այգիի խնամքի ու պահպանութեան ծախսերը:

Scroll Up