«2016-ի Ապրիլը Մեր Հայրենիքը Նորովի Վերարժեւորելու Ընթացք Էր». Բաբգէն Տէր Գրիգորեան

Ապրիլեան քառօրեայ պատերազմէն անցած է 3 տարի: Այդ առիթով ՀՀ սփիւռքի նախարարի պարտականութիւնները կատարող Բաբգէն Տէր Գրիգորեան իր ֆէյսպուքեան էջին վրայ գրած է.

«Այսօր Ապրիլեան պատերազմի 3-րդ տարելիցն է: Մեզմէ իւրաքանչիւրին համար այս պատերազմը ցաւի ու հպարտութեան, կորուստի ու յաղթութեան պատմութիւն է: Մեզմէ իւրաքանչիւրին համար 2016-ի ապրիլը պատմութեան նոր էջի, նոր դասի, մեր հայրենիքն ու մեր սահմանները նորովի վերարժեւորելու ընթացք էր: Բայց ամէնէն առաջ Ապրիլեան հերոսամարտը պատգամ էր մեզի` ամէն օր մեր երկու հայկական պետութիւններուն համար աւելի լաւ ծառայելու, որպէս քաղաքացի կայանալու, անընդհատ առաջ երթալու:

2016-ին մենք տեսանք սխրանքի ու կամքի աներեւակայելի դրսեւորում, մենք տեսանք սպայի ու զինուորի նուիրումը, ուժը, անպարտելիութիւնը: Հաւատացինք մենք մեզի, ի վերջոյ, մենք մէկ բռունցք դարձանք: Մեր կողքին կանգնեցաւ մեր հզօր սփիւռքը, եւ աշխարհի մէջ կրկին վառեցաւ հայկական մեծ, անսահման մեծ ոգին:

Կը խոնարհիմ պատերազմի բոլոր զոհերու յիշատակին առջեւ: Բարձունքը մե՛րն է, եւ դո՛ւք ալ կաք: Ու յաւերժ կ՛ըլլաք, քանի դեռ աշխարհի մէջ կը ծաղկին Հայաստանը, Արցախն ու հայկական Սփիւռքը»:

Scroll Up