Բերիոյ Հայոց Թեմի Քահանաներէն Տէր Եզնիկ Քհնյ. Զղջանեան Վախճանեցաւ

Perio News- 14 Մարտ 2019-ին, անակնկալօրէն յայտնուած հիւանդութեան հետեւանքով վախճանեցաւ Բերիոյ Հայոց Թեմէն ներս երկար տարիներու ծառայութիւն ունեցող Տէր Եզնիկ Քահանայ Զղջանեան։

Կենսագրութիւն Տ. Եզնիկ Քհնյ. Զղջանեանի (1967-2019)

Աւազանի անունով Անդրանիկ, որդի Մկրտիչի եւ Վիքթորիայի, ծնած է Հալէպ, քիլիսցի ընտանիքէ, 1967-ին:
Նախնական կրթութիւնը ստացած է Լ. Նաճարեան-Գ. Կիւլպէնկեան վարժարանէն, ապա միջնակարգը՝ Մխիթարեան վարժարանէն, զոր աւարտած է 1982-ին: Իսկ երկրորդական ուսումը դարձեալ շարունակած է Լ. Նաճարեան վարժարանին մէջ եւ 1985-ին ներկայացած է գրական պաքալորիայի:
Սուրիական բանակի իր ծառայութիւնը կատարած է 1986-1989 թթ.:
Մանկութենէն յաճախած է Ս. Քառասնից Մանկանց մայր եկեղեցի եւ եղած է դպիր: Երկար տարիներ իր մէջ փափաք ունէր դպրեվանք ուսանելու եւ պատրաստուելու, որպէս հոգեւորական: Իր մտադրութիւնը կը յայտնէ Բերիոյ Հայոց Թեմի Առաջնորդ Տ. Սուրէն Ս. Արք. Գաթարոյեանին, որ կ՛ընդառաջէ իր փափաքին եւ պարտ ու պատշաճ տնօրիութիւնը կատարելէ ետք, զինք կը ղրկէ Անթիլիասի «Զարեհեան» դպրեւանքը 1989-ին:
Երեք տարի կը հետեւի դպրեւանքի ընծայարանի դասընթացքներուն եւ կ՛աւարտէ 1992-ին, ստանալով ընծայարանի վկայականը: Նոյն տարին կը վերադառնայ Հալէպ եւ Առաջնորդ Սրբազան Հօր տնօրինութեամբ Ազգ. Հայկազեան վարժարանի վերի չորս կարգերուն համար կը նշանակուի կրօնի ուսուցիչ, միաժամանակ Ս. Քառասնից Մանկանց եկեղեցւոյ դպրաց դասի վարչութեան անդամ կ՛ընտրուի:
1993-ին կը նշանակուի Ս. Քառասնից Մանկանց եկեղեցւոյ դպրապետ, միայն Կիրակի օրերու գիշերային եւ առաւօտեան ժամերգութիւններուն:
Նոյն տարին, Թեմիս Ուսումնական Խորհուրդի որոշումով ուսուցիչ կը նշանակուի Տէր Զօրի մեր հայ մանուկներուն: Շաբաթական երկօրեայ դրութեամբ՝ Ուրբաթ եւ Շաբաթ օրերը կը մեկնի Տէր Զօր, մանուկներուն հայերէն եւ կրօն ուսուցանելու: Այս կրթական առաքինութիւնը կը տեւէ մինչեւ 1997:

Ուսումնական Խորհուրդի թելադրութեամբ, ամառնային երկամսեայ դասընթացք կը հաստատէ Տէր Զօրի մէջ, մեր փոքրաթիւ գաղութի զաւակներուն հայերէն լեզուն զօրացնելու:
Դարձեալ Ուսումնական Խորհուրդի տնօրինութեամբ՝ Եագուպիէի Ազգ. Վերածնունդ վարժարանի աշակերտութեան հայերէն լեզուի ամառնային դասընթացք կը հաստատէ 1997-ին:
Ան, 3 Սեպտեմբեր 1997-ին կը պսակուի օրդ. Թալին Տրակոսեանի հետ եւ բախտաւորուի մանչ զաւակով մը:
Այնուհետեւ կը պատրաստուի քահանայութեան: Առաջնորդ Սրբազան Հօր ու Կրօնական Ժողովի որոշումով կը ճշդուի ձեռնադրութեան թուականը:
Իր քահանայական ձեռնադրութիւնն ու օծումը տեղի կ՛ունենան ձեռամբ Բերիոյ Հայոց Թեմի Առաջնորդ Տ. Սուրէն Ս. Արք. Գաթարոյեանի, Թարգմանչաց Տօնին, 9 Հոկտեմբեր 1997-ին, Ս. Գրիգոր Լուսաւորիչ եկեղեցւոյ մէջ, վերակոչուելով Տէր Եզնիկ եւ օծակից ունենալով Տ. Եղիշէ քհնյ. Սարգիսեանը:
Քառասնօրեայ քահանայութեան շրջանը աւարտելէ ետք, նորընծայ Տ. Եզնիկ կը նշանակուի հոգեւոր հովիւ Ս. Քառասնից Մանկանց եկեղեցւոյ:
Քանի մը տարի ետք, տէր հայրը կ՛ունենայ ընտանեկան դժուարութիւններ: Դժբախտաբար հաշտութեան բոլոր ճիգէրը կ՛ըլլան ի զուր: Երէցկինը անգրգուելի կը մնա իր տեսակէտին մէջ, այնքան որ պատճառ կը դառնայ ամուսնալուծման:
Առաջնորդ Սրբազան Հօր տնօրինումով, տէր հայրը մէկ ուսումնական տարեշրջան՝ 2000-2001 կ՛ուղարկուի Գամիշլի կրօնական առաքելութեամբ: Կը կազմակերպէ Ս. Յակոբ եկեղեցւոյ դպրաց դասը, առաւել՝ կրօն կը դասաւանդէ Ազգ. Եփրատ վարժարանի եօթներորդ կարգին եւ օգտակար կը դառնայ տեղւոյն Կիրակնօրեայ վարժարանի աշակերտութեան: Շարական եւ կրօն ուսուցանելով:
Իր առաքելութիւնը աւարտելէ ետք, կը վերադառնայ Հալէպ եւ դարձեալ Հայկազեան վարժարանի աշակերտութեան կրօն կը դասաւանդէ մինչեւ 2004-ին:
2004-2007 թթ. կրօն կը դասաւանդէ Ազգ. Զաւարեան վարժարանէն ներս, Բերիոյ Հայոց Թեմի Առաջնորդ Տ. Շահան Ս. Եպս. Սարգիսեանի տնօրինումով:
2007-ին, կարճ ժամանակ մը կը դասաւանդէ Ազգ. Քարէն Եփփէ Ճեմարանի իններորդ կարգին:
2008-ին, Առաջնորդ Սրբազան Հօր տնօրինումով կ՛ուղարկուի Գամիշլի, կատարելու մարդահամարը Ս. Յակոբ եկեղեցւոյ ծխական ժողովուրդին: Առաքելութիւնը աւարտելէ ետք կը վերադառնայ Հալէպ:
Իսկ 1998-ին, Լաթաքիոյ հոգեւոր հովիւ՝ Տ. Դանիէլ Ա. քհնյ. Գէւորգեանի վախճանումէն ետք, ան ամրան շուրջ երեք ամիսները կը քահանայագործէ Լաթաքիոյ Ս. Աստուածածին եկեղեցւոյ մէջ, վերակազմակերպելով դպրաց դասը:
Աւելի քան ութ տարի, ամսական դրութեամբ եղած է Թել Ապիատի Ս. Խաչ եկեղեցւոյ հոգեւոր հովիւ:
Վարած է վարչական պաշտօններ.
– 2005-էն ի վեր Թեմիս Քրիստոնէական Դաստիարակութեան Խորհուրդի Ս. Գրոց սերտողութեան եւ նախամուսնական ծրագրաւորման յանձնախումբերուն անդամ:
– 2007-2008 տարեշրջանին անդամ եղած է Ա. դասարանի կրօնի դասագիրքի պատրաստութեան յանձնախումբին:
– 2007-էն ի վեր ատենապետ՝ «Զարեհեան» Գանձատան յանձնախումբին:
– 2007-ին առ ի գնահատանք իր բարւոք ծառայութեան համար, կը ստանայ Լանջախաչ կրելու իրաւունք Արամ Ա. Մեծի Տանն Կիլիկիոյ Վեհափառ Հայրապետէն:

– 2011 Յուլիսին, տէր հայրը կը պսակուի օրդ. Կրեթթա Մարգարեանի հետ, Ս. Քառասնից Մանկանց Մայր եկեղեցւոյ մէջ:

Սուրիոյ պատերազմի ընթացքին քահանայ հայրը մնաց Հալէպ պատնէշի վրայ, նոյնիսկ բամբուշտի մը հետեւանքով վիրաւորուեցաւ, կարճ ժամանակի ընթացքին կ՛ապագինուի: Վերջերս, ինքնաշարժի դժբախտ արկածով մը, աջ ձեռքը կոտրուած էր, մինչ բուժումը, այս անգամ անակնկալ այլ հիւանդութեան մը պատճառով Տէր հայրը շտապ կը տարուի հիւանդանոց, բայց ափսոս հազիւ քանի մը օր՝ 14 մարտ 2019-ին, կը վախճանի Արժանապատիւ Տ. Եզնիկ Քհնյ. Զղջանեանը:
Ան իր ետին թողեց 22 տարիներու քահանայութեան, ինչպէս նաեւ դպրապետութեան ու ուսուցչութեան վաստակ մը, եւ աստուածավախ, եկեղեցասէր, խոնարհ, ծառայասէր, աշխատասէր ու մարդասէր քահանայի մը յիշատակը:
Թող բարձրեալն Աստուած ողորմէ հոգւոյն, Լոյս խորաններուն մէջ հանգչեցնէ զինք եւ Սուրբ Հոգիի մխիթարութիւնը անպակաս ընէ երէցկնոջ, զաւակներուն, Զղջանեան ընտանիքին եւ համայն Բերիոյ Հայոց թեմի հաւատացեալ հայորդիներուն վրայէն:
Յիշատակն արդարոց օրհնութեամբ եղիցի:

Օգտուած ենք՝ Յուսիկ Ա. քնյ. Սեդրակեանի, «Վարք Քահանայից Բերիոյ թեմի 1824-2011» գրքէն, Բ. հատոր, Հալէպ, 2012:

Scroll Up