Աւարտեցաւ Սփիւռքի Նախարար Մխիթար Հայրապետեանի Աշխատանքային Այցը Լիբանան

Սեպտեմբեր 24-ին սփիւռքի նախարար Մխիթար Հայրապետեան Լիբանան կատարած աշխատանքային այցի ծիրէն ներս այցելեց Ազգային միացեալ վարժարան, ուր հանդիպումներ ունեցաւ Լիբանանի հայոց թեմի առաջնորդ Նարեկ Արք. Ալեէմէզեանի, վարժարանի խորհուրդի կազմի` դոկտոր Էլի Թաշճեանի, Նելլի Վեքիլեանի եւ Գրիգոր Էքմէջեանի հետ: Քննարկուեցան առկայ խնդիրներն ու մարտահրաւէրները:
Այնուհետեւ նախարարը շրջայց կատարեց վարժարանին մէջ, նորակառոյց համալիրի տարածքէն ներս:

Մխիթար Հայրապետեան այցելեց նաեւ Հայաստանէն դուրս գոյութիւն ունեցող հայկական միակ բարձրագոյն ուսումնական հաստատութիւն` Պէյրութի Հայկազեան համալսարան եւ հանդիպեցաւ համալսարանի նախագահ Վերապատուելի դոկտոր Փոլ Հայտոսթեանի, համալսարանի «Հայկական սփիւռքի ուսումնասիրութեան կեդրոնի» տնօրէն, «Հայկազեան» հայագիտական հանդէսի պատասխանատու քարտուղար Անդրանիկ Տաքեսեանի, ինչպէս նաեւ համալսարանի փրոֆէսորադասախօսական կազմին հետ: Քննարկուեցան համալսարանի եւ նախարարութեան միջեւ առկայ համագործակցութեան ընդլայնման ուղղուած յետագայ ընելիքները:
Այնուհետեւ հարց ու պատասխանի ձեւաչափով սփիւռքի նախարարը հանդիպում ունեցաւ Հայկազեան համալսարանի ուսանողներու հետ:

Scroll Up