Նիկոլ Փաշինեան Նիւ Եորքի Մէջ Հանդիպած Է ԱՄՆ Հայ Համայնքի Ներկայացուցիչներու Հետ

ՀՀ վարչապետ Նիկոլ Փաշինեան աշխատանքային այցով մեկնած է Ամերիկայի Միացեալ Նահանգներ` Նիւ Եորք: Կառավարութեան ղեկավարը, Սեպտեմբեր 23-ի երեկոյեան, հանդիպում ունեցած է Նիւ Եորքի, ինչպէս նաեւ ԱՄՆ համայնքային կառոյցներու, հայկական կազմակերպութիւններու բազմաթիւ ներկայացուցիչներու հետ:

ՀՀ կառավարութեան տեղեկատւութեան եւ հասարակայնութեան հետ կապերու վարչութեան փոխանցած տեղեկութիւններով՝ Նիկոլ Փաշինեան շնորհակալութիւն յայտնած է անոնց ջերմ ընդունելութեան համար եւ նշած, որ շատերուն Հայաստանի մէջ արդէն իսկ հանդիպած է եւ յոյս յայտնած, որ անոնք պիտի վկայեն, թէ հայրենիքի մէջ այսօր կը տիրէ բոլորովին այլ տրամադրութիւն, այլ մթնոլորտ:

«Երկու օր առաջ նշուեցաւ Հայաստանի Հանրապետութեան անկախութեան 27-րդ տարեդարձը: Անկախութեան տօնակատարութիւններու այդպիսի տօնական մթնոլորտ ՀՀ-ի մէջ անկախութեան հանրաքուէէն ի վեր հաստատուած չէր: Այդ տրամադրութիւնը, ըստ էութեան, այսօր հաստատուեցաւ եւս մէկ փաստով: Տեղեակ էք, որ այսօր տեղի ունեցած են Երեւանի աւագանիի ընտրութիւնները եւ հիմա արդէն տուեալներու 99 տոկոսը ամփոփուած են, «Իմ քայլը» դաշինքը այդ ընտրութիւններուն, որոնք անցած են բացարձակ արդար, ազատ, թափանցիկ պայմաններու մէջ, ստացած է ընտրողներու 81 տոկոս ձայները: Ասիկա կը նշանակէ, որ սին են բոլոր այն պնդումները, խօսակցութիւնները, որոնք կը յիշատակեն տարբեր ուժեր, որոնք կրնան հակայեղափոխութիւն ընել: Ատիկա հնարաւոր չէ եւ այսօր ատիկա արձանագրուեցաւ նաեւ ընտրութիւններուն արդիւնքներով»,- նշած է վարչապետը` աւելցնելով, որ միակ բանը, որ այլեւս հնարաւոր է Հայաստանի մէջ` ատիկա օրինականութիւնն է, ժողովրդավարութիւնը, անկախ դատական համակարգը, ազատ տնտեսական մրցակցութիւնը: Նիկոլ Փաշինեան ընդգծած է, որ ի տարբերութիւն երկար տարիներու, այսօր ՀՀ-ի մէջ չկան մենաշնորհներ, չկան մարդիկ, որոնք արտօնեալ են օրէնքի առջեւ:

«Կան բազմաթիւ խնդիրներ, որոնք կառավարութեան լուծելու առաջնահերթութիւններու թիւին մէջ են. անոնք արտաքին քաղաքական են, տնտեսական, իրաւական եւ այլն: Մարդու իրաւունքներու եւրոպական դատարանը՝ երկու օր առաջ՝ իր առաջին վճիռը հրապարակեց 2008 թուականի Մարտ 1-2-ի դէպքերու գործերուն հետ կապուած, եւ ինչպէս կը պնդեն իրաւաբանները, այդ վճիռին իրաւական նշանակութիւնը հետեւեալն է, որ Մարտ 1-ին եւ անկէ ետք Հայաստանի ողջ դատական համակարգը գործած է ապօրինի, որ ՄԻԵԴ-ի պնդումն է, որուն անկախութիւնը եւ անաչառութիւնը որեւէ կասկած չի ձգեր: Ասիկա կը նշանակէ, որ այն, ինչի մասին կը խօսէի Օգոստոս 17-ի հանրահաւաքին, խօսքը դատական համակարգի խնդիրներուն մասին է, հաստատուեցաւ նաեւ ՄԻԵԴ դատավճիռով»,- ըսած է կառավարութեան ղեկավարը:

Վարչապետը ընդգծած է, որ Հայաստանը այսօր ունի մեծ մարտահրաւէրներ, որոնց լուծման գործին մէջ յոյս կը կապէ նաեւ Սփիւռքի հետ: «Հայաստանի զարգացման տարբերակի առանցքային փոփոխութիւնը հետեւեալն է. Հայաստանի մէջ կային մարդիկ, որոնք բոլորէն կը պահանջէին որեւէ բան ընել: Յեղափոխութիւնը եղաւ, երբ մարդիկ արձանագրեցին, որ որեւէ բան պէտք է ընէ մեզմէ իւրաքանչիւրը: Յեղափոխութեան առանցքային իմաստը այն է, որ ՀՀ իւրաքանչիւր քաղաքացի որեւէ պահու զգաց իր դիրքորոշման շրջադարձային ուժը, զգաց, որն է Հայաստանի այսօրն ու ապագան որոշելու ճանապարհը: Ամենեւին էական չէ, թէ ով պիտի ըլլայ ՀՀ վարչապետի կարգավիճակով՝ ես կամ ոեւէ մէկը, ամենակարեւորը այն է, որ այսօր այլեւս միայն ՀՀ քաղաքացին պիտի որոշէ ազատ, արդար, թափանցիկ, ժողովրդավարական ընտրութիւններով, թէ ով պէտք է ըլլայ իշխանութիւն, ով` ընդդիմութիւն, ով ըլլայ պատգամաւոր եւ ով` ոչ: Ասիկա ամենակարեւոր փոփոխութիւնն է, որ որեւէ պարագայի չի փոփոխուիր: Կրնայ տարօրինակ թուիլ, որ իշխող քաղաքական ուժը Երեւանի աւագանիի ընտրութիւններուն կը ստանայ այդքան ձայն, բայց բոլորդ գիտէք, որ այս ընտրութիւններուն հաղորդուած էր առանձնայատուկ քաղաքական բովանդակութիւն. ես խնդրած էի այս ընտրութիւններուն «Իմ քայլը» դաշինքի օգտին քուէարկելով քուէարկել նաեւ Ազգային ժողովի արտահերթ ընտրութիւններու օգտին կամ ընդդէմ անոր»,- ըսած է Նիկոլ Փաշինեան` աւելցնելով, որ յառաջիկային բանակցութիւններ պիտի հրաւիրէ խորհրդարանական եւ ոչ խորհրդարանական քաղաքական ուժերու հետ` քննարկելու խորհրդարանական արտահերթ ընտրութիւններու ժամանակացոյցն ու պայմանները:

«Կար տրամադրութիւն, որ անոնք իրականացուին մինչ յաջորդ տարուան Յունիս, բայց այն սպասողական վիճակը, որ ունին հաւանական ներդրողները, որոնց հարկաւոր են երկարաժամկէտ քաղաքական արձանագրումներ, ինչպէս նաեւ տնտեսական միջավայրը բարենապաստ դարձնելու համար, ընտրութիւնները պէտք է իրականացնենք աւելի վաղ, որպէսզի առաւել շուտ սկսինք տնտեսութեան վերականգնման ընթացքը: Այսօր մեր տնտեսութեան կառուցուածքը որեւէ լաւատեսութեան հիմք չի տար, եւ անիկա պէտք է փոխենք: Այսօր անիկա բաղկացած է երեք հիմնական ճիւղէ. մէկը գիւղատնտեսութիւնն է, որ ժամանակակից պայմաններուն չի բաւարարեր, միւսը` հանքարդիւնաբերութիւնը, որ ազգային հարստութեան վաճառք կը նշանակէ, միւսը խաղադրոյքներու ոլորտն է: Յուլիսին մեր տնտեսութիւնը աշխուժութեան երկնիշ ցուցանիշ արձանագրած էր. ատոր պատճառը ֆութպոլի աշխարհի առաջնութիւնն էր: Այս կառուցուածքը մեզի ձեռնտու չէ, եւ մենք կ՝ուզենք Հայաստանը գիւղատնտեսական, հանքարդիւնաբերական, խաղադրոյքներ կատարող երկրէն վերածել բարձր ճարտարագիտական երկիր, որ մեր ամենակարեւոր հրամայականն է, որ կը բխի մեր անվտանգային միջավայրէն: Մեր կառավարութիւնը 4 ամսուան մէջ ըրած է իրմէ կախուածը` երկրին մէջ իրավիճակը կայուն պահելու համար, որովհետեւ յետյեղափոխական շրջանի ամենակարեւոր մարտահրաւէրը ա՛յդ է, ինչ յաջողած ենք ընել: Այսօր մեր ամենակարեւոր խնդիրը նոր ներդրումներ ներգրաւելն է: Այդ նպատակով կը դիմնք հարկային օրէնսգիրքի բարեփոխումներու, անկախ դատական համակարգի հաստատման, քաղաքական կայուն վիճակի պահպանման, որուն համար պէտք է մօտ ժամանակներս իրականացնենք արտահերթ խորհրդարանական ընտրութիւններ: Երեւանի աւագանիի ընտրութիւններուն արդիւնքներով բոլորին ակնյայտ է, որ խորհրդարանական արտահերթ ընտրութիւնները անխուսափելի են, եւ անոնք պէտք է հնարաւորինս շուտ տեղի ունենան»,- ընդգծած է վարչապետը:

Գործադիրի ղեկավարը աւելցուցած է, որ Հայաստանի մէջ այսօր մենաշնորհներն ու կաշառակերութիւնը յաղթահարուած են, աւագանիի ընտրութիւնները անցած են առանց կաշառակերութեան, թաղային, քրէական հեղինակութիւններու միջամտութեան: «ՀՀ քաղաքացիները հնարաւորութիւն ունեցած են քուէարկելու անոր օգտին, որուն կ՝ուզեն, եւ ի վերջոյ անոնք քուէարկած են յեղափոխութեան, արտահերթ խորհրդարանական ընտրութիւններու, ազատ եւ երջանիկ Հայաստանի օգտին: Այսօր դրամը ընտրութիւններու արդիւնքներուն վրայ չունի որեւէ ազդեցութիւն, կը ստեղծենք գործիքներ, որ դրամը քաղաքականութեան մէջ օգտագործուի ոչ թէ ձայն գնելու, այլ ըսելիքը աւելի հասանելի դարձնելու համար»,- շեշտած է Նիկոլ Փաշինեան:

Անդրադառնալով Հայաստան-Սփիւռք յարաբերութիւններուն` վարչապետը նշած է, որ անոնց ծիրէն ներս պէտք է խրախուսուի ո՛չ թէ բարեգործութիւնը, այլ՝ աշխատանքը: «Հայութիւնը կրնայ Հայաստանին աջակցիլ ընդամէնը մէկ տարբերակով` Հայաստանի մէջ ծաւալելով տնտեսական գործունէութիւն, հիմնադրելով որեւէ գործարարութիւն եւ աշխատելով: Այսօր Հայաստանի ընկալումը հետեւեալն է. անիկա երկիր մըն է, ուր կարելի է ծաւալել տնտեսական գործունէութիւն, աշխատանք հիմնադրել, շահոյթ ստանալ, հարստանալ եւ հարստացնել: Մեր ուղերձը բոլորին հետեւեալն է. հարստացէք եւ հարստացուցէք: Մենք կ՝ուզենք, որ Հայաստանը ընկալուի այդպիսի երկիր, Հայաստանի մէջ պէտք է իրականացնել ոչ թէ բարեգործական, այլ զարգացման ծրագիրներ, այնպիսին, ինչպիսին նաեւ «ԹՈւՄՕ» կեդրոնն է, որ դարձած է ժամանակակից Հայաստանի ամենակարեւոր կեդրոններէն մէկը: Յոյս ունինք, որ Հայաստանի մէջ պիտի ստեղծուին նորանոր միջազգային մակնիշներ, որոնք պիտի փոխեն պետութեան եւ հայ ժողովուրդի ճակատագիրը ռազամավարական առումով: Գոյատեւող Հայաստանի ժամանակը աւարտած է, եկած է զարգացող Հայաստանի ժամանակը: Հայաստան-Արցախ-Սփիւռք յարաբերութիւններուն պէտք է վերաբերինք իբրեւ մէկ միասնական մարմին»,- ըսած է կառավարութեան ղեկավարը:

Նիկոլ Փաշինեան՝ ի պատասխան հնչած հարցի` անդրադարձած է նաեւ Հայաստանի արտաքին քաղաքականութեան: «Մենք կը պատրաստուինք զարգացնել յարաբերութիւնները բոլոր միջազգային գործընկերներու հետ, բայց չենք պատրաստուիր ատիկա ընել այլ գործընկերոջ մը հետ յարաբերութիւններու հաշուին: Պիտի փորձենք ՌԴ-ի, ԵԱՏՄ գործընկերներու, Իրանի, Վրաստանի, ԵՄ-ի ու ԱՄՆ-ի հետ յարաբերութիւնները բարձրացնել նոր մակարդակի: Այդ յարաբերութիւններուն մէջ պէտք է ըլլանք աւելի վստահ, ինքնիշխան պետութեան յատուկ մօտեցումներով, իսկ արտաքին քաղաքականութիւնը վարենք ազգային շահերը սպասարկելու, այլ ոչ թէ իշխանութիւնը պահպանելու անհրաժեշտութենէն մեկնած»,- շեշտած է վարչապետը:

Նիկոլ Փաշինեան պատասխանած է ամերիկահայերու շարք մը այլ հարցերու եւս, որոնք վերաբերած են Հայաստանի մէջ խօսքի ազատութեան, զանգուածային լրատուական միջոցներու ազատ գործունէութեան, մարդու իրաւունքներու պաշտպանութեան, անկախ դատական համակարգի ապահովման, «Հայաստան» համահայկական հիմնադրամի գործունէութեան, կրթութեան, թեթեւ արդիւնաբերութեան, դրամատնային համակարգի զարգացման եւ այլ թեմաներու:

Scroll Up