«Կը Ցանկամ, Որ Իմ ընտանիքէն Ներս Հայապահպանութեան Խնդիր Այլեւս Չըլլայ. «Քայլ Դէպի Տուն» Ծրագիրի Վիրահայ Մասնակից

Թիֆլիսահայ 21-ամեայ Ստելլա Սելեփանովան ՀՀ սփիւռքի նախարարութեան «Քայլ դէպի տուն» ծրագիրի մասնակիցներէն է: Ան Թիֆլիսի հայկական համայնքի աշխոյժ անդամներէն է: Ծրագիրին մասին լսած է քաղաքին մէջ գործող «Հայարտուն» կեդրոնէն: «Թէեւ շատ եկած եմ Հայաստան եւ մասնակցած եմ տարբեր փառատօններու եւ համերգներու, բայց այս անգամ եւս չէի կրնար չօգտուիլ Հայաստան գալու ինծի համար այնչափ կարեւոր հնարաւորութենէն: Դասաւանդելով հայկական ժողովրդական եւ ազգագրական պարեր Ռուսթաւի Գրիգոր Նարեկացիի անուան հոգեւոր, կրթամշակութային, երիտասարդական կեդրոնին մէջ` հայապահպանութեան գործին մէջ շատ կարեւոր կը համարեմ նաեւ ազգային պարերու պահպանումը եւ փոխանցումը սերունդներուն,- «Հայերն այսօրի» հետ զրոյցին ըսաւ Ստելլան եւ աւելցուց,- «Մեր ընտանիքին մէջ շատ խիստ  է հայապահպանութեան հարցը: Տան մէջ կը խօսինք բացառապէս հայերէն, իսկ գրել, կարդալ սորված եմ հայկական կիրակնօրեայ դպրոց յաճախելով, որուն շնորհիւ ինքզինքս լիարժէք հայ կը զգամ»:

Այն հարցին, թէ կը ցանկա՞ր արդեօք Հայաստանի մէջ ապրիլ, Ստելլան անկեղծօրէն պատասխանեց. «Թէեւ Թիֆլիս  ծնած ու մեծցած եմ, բայց ինծի համար իբրեւ հայրենիք կ՛ընդունեմ միայն Հայաստանը: Սիրով կ’ամուսնանայի եւ վերջնականապէս բնակութիւն կը հաստատէի Երեւանի մէջ, որ իմ ապագայ երեխաներս մեծնային հայկական աւանդոյթներով, հայկական միջավայրի մէջ, որպէսզի իմ ընտանիքէն ներս հայապահպանութեան խնդիր այլեւս չըլլայ»:

Ռուզաննա Ալեքսանեան

Scroll Up