ՀՀ սփիւռքի նախարարութեան «Արի տուն» ուսումնաճանաչողական ծրագիրի անցումային փուլի մասնակից 14-ամեայ Մարինա Պետրոսեան կ՛ապրի Իրաքի Պասրա քաղաքին մէջ, կը յաճախէ հայկական դպրոց, ուր կը դասաւանդեն հայոց լեզու, կրօն, հայոց պատմութիւն եւ այլ առարկաներ:

Մարինան ոգեւորութեամբ կը յաճախէ դասերուն` գիտակցելով օտարութեան մէջ ազգային դիմագիծի ու հարազատ լեզուի պահպանման անհրաժեշտութիւնը: Տան մէջ ալ անվերապահօրէն հայերէն կը խօսին, կը հետեւին հայկական աւանդոյթներուն, կը նշեն տօները:

Սուրբ Ծննդեան տօնը Մարինայի համար մեծ խորհուրդ ունի, ամէն տարի սրտի թրթիռով կը սպասէ ընկերներուն եւ ընտանիքի անդամներուն հետ հայկական եկեղեցի երթալուն, որպէսզի Սբ.Պատարագին մասնակցին:

«Իրաքահայ հասակակիցներուս հետ  մասնակցած եմ «Արի տուն» ծրագիրին: Յագեցած օրեր  անցուցած եմ, տպաւորութիւններս աննկարագրելի են: Ամէն ինչ լաւ  կազմակերպուած էր. մարդիկ ամէնուր մեզի հոգատար վերաբերմունքի կ՛արժանացնէին»,-«Հայերն այսօր»-ի հետ զրոյցին ըսաւ  Մարինան` աւելցնելով, որ Հայաստանի մէջ ամէն ինչ կը սիրէ, յատկապէս` բնութիւնն ու համեղ ուտելիքները:

Մարինան կարեւոր նուաճում կը համարէ ծրագիրի ծիրէն ներս հայրենագիտութեան դասընթացներուն մասնակցիլը: Ան իր խօսքին մէջ շնորհակալութիւն յայտնեց ուսուցչուհիին` Սօսի Աւագեանին, որ դասընթացներուն ժամանակ սրտբաց ամէն ջանք գործադրած է` բազմաբնոյթ տեղեկութիւններ հաղորդելու համար:

Ան նշեց նաեւ, որ Հայաստանի մէջ հոգեպէս հանգիստ եղած է, կարծես իր տան մէջ էր, քանի որ օտարութիւն չէ զգացած:

Մարինան քաջատեղեակ է, որ Հայաստանի մէջ որակեալ կրթութեան համար բոլոր նպաստաւոր պայմաններն առկայ են, եւ գուցէ ատիկա ալ դառնայ պատճառ, որ յետագային բարձրագոյն կրթութիւնը այստեղ ստանայ:

Գէորգ  Չիչեան