«Արի Տուն», «Իմ Հայաստան» Եւ «Ամառնային Դպրոց» Ծրագիրները Ժամանակաւորապէս Պիտի Յետաձգուին

Յունիս 5-ին ՀՀ սփիւռքի նախարարութեան մէջ տեղի ունեցաւ «Սփիւռքի նախարարութեան 2018 թուականի ծրագիրներու ճակատագիրը» թեմայով մամուլի ասուլիս: Զեկուցողներն էին սփիւռքի նախարար Մխիթար Հայրապետեան, փոխնախարար Դաւիթ Սարգսեան ու «Հայրենիք–Սփիւռք կեդրոն»  ՊՈԱԿ-ի տնօրէն Յակոբ Ասլանեան:

Ասուլիսի ժամանակ նախարարը նշեց, որ ծանօթանալով «Հայրենիք-Սփիւռք» կեդրոն ՊՈԱԿ-ի միջոցով իրականացուած յայտերուն եւ ֆինանսական ծախսերուն` ի յայտ եկան մտահոգութիւններ. մասնաւորապէս նախարարը չբացառեց, որ 2018 թուականի պետական պիւտճէով հաստատուած ծրագիրները, որոնք դեռեւս չեն իրականացուած, բայց ատոնց համար տեղի ունեցած  են համապատասխան մրցոյթներ, կրնան պարունակել կաշառակերութեան վտանգներ:

Մխիթար Հայրապետեան նշեց, որ պէտք է որոշում կայացուէր` ծրագիրներն իրականացնել, կասեցնել կամ ժամանակաւորապէս յետաձգել: Որոշուեցաւ  ծրագիրները ժամանակաւորապէս յետաձգել:

Շուտով պէտք է իրականացուին ստուգումներ ֆինանսական ծախսերու ու տեղաշարժերու հետ կապուած: Այս առիթով նախարարը հանդիպած է պետական վերահսկողութեան ծառայութեան պետ Դաւիթ Սանասարեանի հետ ու ներկայացուցած իրավիճակը: Կողմերը   համաձայնութեան եկած են  գործակցիլ այս ոլորտին մէջ: Դաւիթ Սանասարեանի յանձնարարականով պիտի իրականացուի հաշուեքննութիւն:

Ծրագիրներու  ժամկէտներու մասին տեղեկատուութիւն կը տրուի յառաջիկային:

 

Scroll Up