Մեկնարկած Է Լրագրողներու Համահայկական 9-րդ Համաժողովը

Մայիս 30-ին ՀՀ սփիւռքի նախարարութեան մէջ մեկնարկեց Լրագրողներու համահայկական 9-րդ համաժողովը:

Սփիւռքի նախարարի տեղակալ Բաբգէն Տէր Գիրիգորեանը ներկաներուն փոխանցեց նախարար Մխիթար Հայրապետեանի ողջոյնի խօսքը, որուն մէջ մասնաւորապէս կ՛ըսուէր. «Սիրով ողջունում եմ ձեզ նոր Հայաստանում եւ յայտնում եմ իմ խորին երախտիքը ձեր ներկայութեան եւ այն աջակցութեան, այն խանդավառութեան ու զօրակցութեան համար, որ դուք ցուցաբերեցիք թաւշեայ յեղափոխութեան կայացման եւ սփիւռքեան լրատուամիջոցներում նրա ողջ ընթացքն ու փիլիսոփայութիւնը պատշաճ ներկայացնելու, լուսաբանելու գործում: Խորհրդանշական էր, որ հէնց Հայոց պետականութեան վերակերտման 100-րդ տարեդարձի նախօրէին   սկիզբ առած խաղաղ անհնազանդութեան շարժումը համազգային դրսեւորում ստացաւ: Սփիւռքը թեւ ու թիկունք դարձաւ սիրոյ ու համերաշխութեան յեղափոխութեանը, որը  յաղթեց ողջ հայ ժողովրդի միասնական կամքով` սկզբնաւորելով ազգային զարթօնքի, Հայոց պետականութեան ամրապնդման, երկրի իմիջը բարձրացնելու նոր փուլ»:

Նախարարն իր խօսքին մէջ վստահութիւն  յայտնած էր, որ Հայաստան-Սփիւռք յարաբերութիւններուն մէջ եւս յեղափոխութիւն կ’իրականանայ` նոր մտածողութեամբ, նոր ոճով, սիրոյ ու անկեղծութեան վրայ հիմնուած յարաբերութիւններու զարգացման նոր տրամաբանութեամբ:

«Այս ընթացքն անշրջելի է, մենք միասին ենք կառուցելու իսկապէս արդար, իսկապէս ազատ եւ իակապես զարգացող Հայրենիք: Վստահ եմ, որ այս համաժողովը կը դառնայ վերաարժեւորման, մեր խնդիրները անկեղծ ու կառուցողական մթնոլորտում քննարկելու, լուծումներ գտնելու բացառիկ հարթակ: Եւ, ի վերջոյ կը ձեւաւորուի առողջ ու կենսունակ համահայկական տեղեկատուական դաշտը»,-կ՛ըսուէր Սփիւռքի նախարարի խօսքին մէջ:

Ողջոյնի խօսքով հանդէս եկան Հայաստանի լրագրողներու միութեան նախագահ Սաթիկ Սէյրանեան, Լրատուամիջոցներու համահայկական ընկերակցութեան փոխնախագահ Գայեանէ Առաքէլեան, Լրագրողներու համահայկական համաժողովները համակարգող մարմնի նախագահ Շահան Գանտահարեան:

Այնուհետեւ համաժողովն իր աշխատանքերը շարունակեց 4 նիստերով:

Համաժողովի բացման կը մասնակցէին մօտ 70 լրագրողներ Սփիւռքէն, նաեւ Հայաստանի եւ Արցախի լրատուամիջոցներու ներկայացուցիչներ:

Համաժողովը կ’ընթանայ նաեւ մայիս 31-ին եւ յունիս մէկին:

 

Scroll Up