«Հայաստանի Հանրապետութիւնը Եւ Հայ Եկեղեցւոյ Դերակատարութիւնը Հայոց Պետականութեան Կայացման Գործին Մէջ (1918-2018 թթ.)» Խորագիրով Գիտաժողովն Ամփոփեց Իր Աշխատանքները

Մայիս 22-ին ՀՀ սփիւռքի նախարարութեան եւ Մայր Աթոռ Սուրբ Էջմիածինի «Վաչէ եւ Թամար Մանուկեան» Մատենադարանի նախաձեռնութեամբ տեղի ունեցած «Հայաստանի Հանրապետութիւնը եւ Հայ եկեղեցւոյ դերակատարութիւնը Հայոց պետականութեան կայացման գործին մէջ (1918-2018 թթ.)» խորագիրով գիտաժողովը, որուն կը մասնակցէր ՀՀ սփիւռքի նախարար Մխիթար Հայրապետեան, ամփոփեց աշխատանքերը:

Գիտաժողովին ներկայ էին ներկայացուցիչներ Մայր Աթոռ Սուրբ Էջմիածինէն, Մեծի Տանն Կիլիկիոյ Կաթողիկոսութենէն, Հայ Կաթողիկէ եւ Աւետարանական եկեղեցիներէն, տարբեր գիտական, կրթական հաստատութիւններէ:

Գիտաժողովի աւարտին մասնակիցները հանդէս եկան ուղերձով, որուն մէջ կ՛ըսուի.

«Գիտաժողովի մասնակիցներս մեր երախտագիտութիւնը կը յայտնենք Ն.Ս.Օ.Տ.Տ. Գարեգին Բ Ծայրագոյն Պատրիարք Ամենայն Հայոց Կաթողիկոսին, որ իր շնորհաբաշխ պատգամը բերաւ Մայիսեան հերոսամարտերուն եւ Հայաստանի Հանրապետութեան 100-ամեակին նուիրուած գիտաժողովին: Մեր շնորհակալութեան խօսքը կ՛ ուղենք ՀՀ սփիւռքի նախարար Տիար Մխիթար Հայրապետեանին իր ներկայութեան եւ ողջոյնի խօսքին համար, ինչպէս նաեւ  գիտաժողովի կազմակերպիչներուն` ՀՀ սփիւռքի նախարարութեան եւ Մայր Աթոռի «Վաչէ եւ Թամար Մանուկեան» Մատենադարանի աշխատակիցներուն:

Գիտաժողովը վերստին առիթ ստեղծեց պատմութեան խորքերը ներթափանցելու, Պետութիւն-եկեղեցի յարաբերութիւններուն անդրադառնալու եւ պատմական իրադարձութիւններէն դասեր քաղելու, արդի համաշխարհայնացման դարաշրջանին ազգային ձեռքբերումները պահպանելու, հայապահպանութիւնը զօրացնելու, հայրենադարձութիւնը խրախուսելու եւ ազգային միասնութիւնը համազգային գաղափարախօսութեան գործուն փաստի վերածելու:

Կ՛արձանագրենք, որ գիտաժողովի զեկուցումներու հենքին վրայ յանգեցանք կարեւոր եզրակացութիւններու, ըստ որոնց` շեշտուեցաւ Հայաստանեայց Առաքելական Սուրբ Եկեղեցւոյ,  որպէս ազգային մնայուն արժէքի, բացառիկ առաքելութիւնը Հայոց պատմութեան մէջ, յատկապէս արդի ժամանակաշրջանին անոր  շուրջը համախմբուելու, ազգային ինքնութեան (հայրենիք, ազգ, մայրենի լեզու, հաւատք, նախնեաց ժառանգութիւն) պահպանման եւ զարգացման անհրաժեշտութիւնը:

Ներկայիս հրամայական  դարձած է մեր ժողովուրդի Ազգային Եկեղեցւոյ առաջնորդութեամբ աշխարհասփիւռ հայութեան բոլոր հատուածներու մէկտեղումը  համազգային կենսական խնդիրներու լուծման գործին մէջ` Հայոց Պետութեան անվտանգութեան ամրացման, Հայ Դատի`  Հայոց Ցեղասպանութեան միջազգային ճանաչման, հետեւանքներու վերացման ու հատուցման, եւ Արցախի հիմնախնդիրի խաղաղ լուծման, հայեցի դաստիարակութեան, ազգային մշակոյթի եւ երկրի ընկերային-տնտեսական վերելքի ոլորտներուն մէջ:

Գիտաժողովի մասնակիցներս անգամ մը եւս կը հաստատենք այն ճշմարտութիւնը, որ արդի Հայատանի Հանրապետութիւնը, ներառեալ ինքնորոշուած Արցախի Հանրապետութիւնը, համայն հայութեան լինելութեան միակ առհաւատչեան է, իսկ Հայաստանի անկախութեան պահպանումը եւ պաշտպանութիւնը` իւրաքանչիւր հայորդիի սրբազան պարտքը:

Կը յորդորենք մեր Հայրենի պետութիւնը, որ շարունակէ մշտապէս ուշադրութեան կեդրոնին մէջ պահել եւ ջանքեր գործադրել ի նպաստ ազգային-քրիստոնէական արժեհամակարգի առաւել զարգացման:

Գիտաժողովի մասնակիցներս սրտագին կերպով կը շնորհաւորենք մեր ողջ ժողովուրդը պանծալի յոբելեաններու առիթով»:

Scroll Up