Սուրիահայ Աղջկան Նուէրը Արցախին

«Նարեկացի» արուեստի միութեան տարածած «Նարեկացի-Շուշի» նուագախումբի եւ ատոր լիարժէք գործունէութեան համար անհրաժեշտ գործիքներու նուիրատուութեան մասին յայտարարութիւնն անտարբեր չձգեց նաեւ սուրիահայ Քեշգերեաններու ընտանիքը:

Ընտանիքի փոքրիկ աղջնակը` 9-ամեայ Ալիսան, կը յաճախէ «Նարեկացի» արուեստի միութեան Սեւան Նագգաշեանի անուան նկարչական դասարանի սուրիահայերու խմբակ, ուրկէ ալ եւ տեղեկացած է «Նարեկացի-Շուշի» նուագախումբին երաժշտական գործիքներ նուիրաբերելու անհրաժեշտութեան մասին:

Ալիսա Քեշգերեան  քանի մը ամիս է, որ հանդէս կու գար իր փոքրիկ երաժշտական գործիքով` քանոնով, սակայն քանի որ վերջերս ծնողներէն նուէր ստացած էր մեծ քանոն, ուստի ցանկացաւ իր փոքրիկ քանոնը նուիրել «Նարեկացի-Շուշի» նորաստեղծ նուագախումբին` իր ներդրումն ունենալով ազգային մշակոյթի ծաղկեցման ուղղուած այս հրաշալի նախաձեռնութեան:

«Նարեկացի» արուեստի միութիւնը մեծ երախտագիտութեամբ կ’ընդունէ Քեշգերեաններու ընտանիքին կողմէ եղած նուիրատուութիւնը. այս փոքրիկներու անկեղծ, անշահախնդիր եւ մաքուր վերաբերմունքն արուեստի նկատմամբ հիմք կու տայ վստահ ըսելու, որ ՆԱՄ-ի` հայկական մշակոյթի պահպանման ու զարգացման ուղղուած քայլերն անարդիւնք չեն մնար:

Scroll Up