«Հայաստան-Սփիւռք» Համահայկական 6-րդ Համաժողովը Մեզի Ուժ Ու Ոգի Հաղորդեց». Արտօ Օքսայեան

Սեպտեմբեր 26-ին ՀՀ սփիւռքի նախարար Հրանոյշ Յակոբեան ընդունեց Ֆրանսայի Նիցա քաղաքի Ծխական խորհուրդի ատենապետ Արտօ Օքսայեանը, Նիսի հայկական համայնքի ներկայացուցիչներ Մարի եւ Յակոբ Ալթիփալակեանները:

Ողջունելով հիւրերը` ՀՀ սփիւռքի նախարարը հետաքրքրուեցաւ համայնքի նորութիւններով եւ յառաջիկայ ծրագիրներով, կարեւոր համարեց Արտօ Օքսայեանի հայանպաստ գործունէութիւնը համայնքը միաւորելու, զօրացնելու, Հայրենիքի հետ կապը ամուր պահելու ուղղութեամբ:

Արտօ Օքսայեան շնորհակալութիւն յայտնեց ջերմ ընդունելութեան համար, ներկայացուց իր տպաւորութիւնները «Հայաստան-Սփիւռք» համահայկական 6-րդ համաժողովին վերաբերեալ. «Շատ կարեւոր ու արդիւնաւէտ հաւաք էր, որ մեզի ուժ ու ոգի հաղորդեց: Սփիւռքի հայութեան մեծ պարտականութիւնն է` Հայաստանի կողքին ըլլալ: Սփիւռքահայու համար մեծ պարծանք է օգտակար ըլլալ Հայրենիքին», – աւելցուց համայնքային գործիչը:

Մարի եւ Յակոբ Ալթիփալակեանները նոյնպէս անդրադարձան Հայաստանի մէջ կատարուող փոփոխութիւններուն: Տիկին Մարին մասնաւորապէս շեշտեց. «Մենք ամէն տարի կու գանք Հայաստան եւ ամէն անգամ աւելի գեղեցիկ, նորացուած կը տեսնենք մեր Հայրենիքը: Շատ մեծ առաջընթաց կայ: Ինծի կը հիացնեն Երեւանի ճարտարապետութիւնը, փողոցներու մաքրութիւնը: Ժողովուրդը բարեկիրթ է, բարեհամբոյր, ջերմ»:

Քննարկուեցան հայապահպանութեան ու լեզուի պահպանման, Հայաստան-Սփիւռք կապերու ամրացման ու զարգացման ուղղուած այլ հարցեր:

 

 

 

Scroll Up