«Մեր  արմատները թերեւս խորն են աւելի, քան բարձր է մեր սաղարթը:

Ով պատմութիւն  ունի, չի կարող ետ չնայել,

ով անցեալ ունի, չի կարող յիշողութիւն չունենալ»:

Պարոյր Սեւակ

Օգոստոս 14-ին մեկնարկեց «Արի տուն-2017» ծրագիրի վերջին`  8-րդ փուլը, որուն կը մասնակցին շուրջ 70 պատանի ու աղջիկ Ռուսաստանէն, Սուրիայէն, Թուրքիայէն, Ռումանիայէն, Ֆրանսայէն, Գերմանիայէն, Անգլիայէն, Լեհաստանէն, Արաբական Միացիալ Էմիրութիւններէն:

«Հայերն այսօր»-ի փոխանցմամբ` օգոստոս 15-ին արդէն Երեւանի Եղիշէ Չարենցի անուան դպրոցին մէջ մեկնարկեց «Արի տուն-2017» ծրագիրի 8-րդ փուլի Հայոց լեզուի ուսուցման դասընթացքը, որուն բացման արարողութեան ելոյթ ունեցաւ Սփիւռքի նախարարութեան Համահայկական ծրագիրներու վարչութեան գիտակրթական ծրագիրներու բաժինի պետ տիկին Սիրվարդ Համբարեան: Ան ներկայացուց «Արի տուն» ծրագիրի առաւելութիւնները, ներկաներուն ծանօթացուց դասաւանդող ուսուցիչներուն, որոնք իրենց գործի նուիրեալներ են եւ կ’ընեն ամէն ինչ` մասնակիցներուն հայեցի դաստիարակութեան համար:

Դասընթացքին ուսուցիչներուն կողմէ կիրառուած   են տարատեսակ մեթոտական աշխատանքներ`  տառուսուցում,  բանաւոր եւ գրաւոր  խօսքը զարգացնող  ուղղագրական- ուղղախօսական առաջադրանքներ, խաչբառեր, ոտանաւորներ, քերականական հանելուկներ, առած- ասացուածքներ, խաղ-առաջադրանքներ:

Ինքնատիպ  անցած են եզրափակիչ դասերը:Մոսկուայի Վերածնունդ հայկական դպրոցի տնօրէն Շողիկ Փահլեւանեան նշեց, որ մեծ աշխատանք տարուեցաւ երեխաներուն հայկական արմատներուն մօտ պահելու եւ սնելու ուղղութեամբ: Ան   իր երախտագիտութեան խօսքը  յայտնեց Ռուսաստանէն ժամանած  իր խումբի  մասնակիցներուն ու յատկապէս անոնց ծնողներուն, որոնց շնորհիւ այսօր անոնք հայրենիքի մէջ են:  Այդ  խումբի անդամները գրաճանաչ  չէին եւ չէին տիրապետեր մայրենի լեզուին, բայց ուշիմ ու հայրենասէր ըլլալով ` այդ դասընթացքին ժամանակ իրենց միասնական հրաժեշտի նամակին մէջ նշեցին, որ այն գիտելիքները,  որոնք ստացան անոնք այսօր`  իրենց հետ պիտի տանին եւ ալ աւելի պիտի զարգացնեն  ու  հարստացնեն իրենց բնակավայրերուն մէջ: Եզրափակիչ դասը  երեխաները  աւարտեցին տիկին Շողիկ  Փահլեւանեանի  «Ռուս- հայերէն զրուցարանի», «Անգլերէն-ռուսերէն-հայերէն զրուցարանի», «Հայկական երգերու ժողովածուի» եւ հայ մեծերու` Մայրենիին նուիրուած թեւաւոր խօսքերով, բանաստեղծութիւններով ու երգերով:

Հետաքրքիր  անցած է ամփոփիչ դասը Լուսինէ Հայրիյեանի մօտ, ուր  մասնակիցները հանդէս   եկած են «Հայաստանի զարգացման ծրագիրները» խորագիրով հարցումին:   Գայեանէ  Բաբլոյան  անցածը ամփոփեց հայրենագիտական հարցումներով,  Այտա Օհանեան`  «Ո՛րն է հայ ժողովուրդի գաղտնիքը» հարցադրմամբ բացաւ խումբի անդամներու ներաշխարհը, իսկ   Մաքրուհի Գէորգեանի խումբին մէջ մասնակիցները Մայրենիով  փորձած են զուգադրել իրենց երկիրներուն եւ Հայաստանի ընդհանրութիւններն ու տարբերութիւնները` ընդգծելով Հայաստանի առաւելութիւնները` յայտնելով հայրենիք վերադառնալու իրենց պատրաստակամութիւնը: Մայրենիի կարեւորութիւնը Սերա Շահինեան ապահոված  է առած-ասացուածքներու գործածութեամբ:

Հրաժեշտէն առաջ բոլոր արիտունցիներն իրենց շնորհակալական խօսքը ըսին ՀՀ սփիւռքի նախարարութեան «Արի տուն» ծրագիրի կազմակերպիչներուն,  Եղիշէ Չարենցի անուան  դպրոցի տնօրէն Անահիտ Խեչումեանին: Բոլորի ցանկութիւնն էր, որ «Արի տուն» ծրագիրը ըլլայ շարունակական, նորանոր առիթներ ընձեռնուին հայրենիք վերադառնալու եւ իրենց նպաստը ներդնելու հայրենիքը միասնաբար շէնացնելու գործին մէջ: Տեղին է մէջբերել Վ. Պելինսկիի խօսքերը. «Ով չի պատկանիր իր հայրենիքին, ան չի պատկանիր նաեւ մարդկութեան»: