Արեւածիծաղ Աչուկներով Սալբին Ու Համակրելի Արտէնը` Պոլիսէն `«Արի Տուն» Ծրագիրի Մասնակիցներ

ՀՀ  սփիւռքի նախարարութեան «Արի տուն» հայրենաճանաչողական ծրագիրը   թեւակոխեց վերջին` 8-րդ փուլը, որուն ծիրէն ներս  Սփիւռքի տարբեր երկիրներէ ժամանած  հայորդիները  մասնակցեցան  այդ փուլի բացման հանդիսաւոր արարողութեան: Այնուհետեւ անոնք պէտք է այցելէին Սուրբ Մեսրոպ Մաշտոցի  ուխտավայր-գերեզման` Օշական: Այդ ընթացքին «Հայերն այսօր»-ի համար հարցազրոյց  ունեցայ Պոլիսէն ծրագիրին մասնակցող երկու լուսաչուի, հայկական  անուշիկ  դիմագիծներով  հայորդիներու` Արտէնի եւ Սալբիի հետ:

 Արտէն  Արսլան, 17 տարեկան

-Ես   եկած եմ  Պոլիսէն, կը յաճախեմ Կեդրոնական վարժարան: Այս ծրագիրին մասին  մեր դպրոցին մէջ, ընկերներէս  լսած եմ: Առաջին անգամ  Հայաստան կու գամ. ուրախ եմ, որ պէտք է տեսնեմ մեր պատմամշակութային յուշարձանները: Մեր արմատները Արեւմտեան Հայաստանէն են: Հայրս կաշեգործ է, մայրս` տանտիկին: Մենք դպրոցին մէջ շատ բան սորված ենք Հայաստանի, արեւմտահայ, արեւելահայ գրողներու մասին. ես  յատկապէս  շատ կը սիրեմ Յակոբ Պարոնեանի, Թէքէյեանի, Երուանդ Օտեանի ստեղծագործութիւնները: Ինծի համար  հետաքրքիր է այս ծրագիրին մասնակցիլը:

Սալբի  Մոր, 15 տարեկան

-Ես ալ կը յաճախեմ Կեդրոնական վարժարան եւ առաջին անգամ կու գամ Հայաստան: «Արի տան» մասին լսած եմ մեր վարժարանէն եւ ցանկացայ մասնակցիլ ծրագիրին: Մինչեւ Հայաստան գալս` քիչ բան գիտէի Հայաստանի մասին, սակայն այս օրերուն ընթացքին աւելի մօտէն կը ծանօթանամ  տեսարժան վայրերուն: Ես հայ գրողներէն գիտեմ Յակոբ Պարոնեանը, Թէքէյեանը, Մուշեղ Իշխանը…իմ կարծիքովս Երեւանը շատ գեղեցիկ է, սակայն ես կը տեսնեմ նաեւ հին, ոչ գեղեցիկ շինութիւններ, որոնք կը խանգարեն միւս գեղեցկութիւններուն:

… Հայերը,  ուր ալ,  որ ըլլան,  աշխարհի որ ծայրն ալ  գտնուին, ինչ կերակուր ալ վայելեն, միեւնոյնն է, հաճոյքով  կ’ըմբոշխնեն մեր հայկական աւանդական տոլման, թօփիկը, որոնց  մասին մեր զրոյցի աւարտին սիրով յիշատակեցին Արտէնն ու Սալբին, անոնք  չմոռցան  նշելու նաեւ Երեւանի  համեղ ջուրին  մասին: Մեր զրոյցի ընթացքին իմ հարցերուս տուած անոնց անկեղծ ու անմիջական պատասխանները,  իւրօրինակ կարծիքները 1-2 օրուան հիւրընկալութեան եւ առաջին օրերու տպաւորութիւններուն  հետ կապուած`  կը խօսին  հայրենաճանաչողական այս ծրագիրի  հետաքրքրութեան  ու  սփիւռքահայ երիտասարդներուն կողմէ սիրուած ըլլալուն մասին: Բարի ճանապարհ մաղթելով համակրելի  երիտասարդին` Արտէնին ու գեղեցիկ հիւսքերով,  արեւածիծաղ աչուկներով  Սալբիին դէպի Օշական ` կ’իյնամ մտորումներու գիրկը.   անոնց  շա՜տ հայկական արտաքինը  ինծի կը տանի դէպի նախնիներուս  երկիր, դէպի  Սասուն ու Մուշ, դէպի  Վանայ լիճ ու Մեղրագէտ, դէպի  Զէյթուն , Կարս ու Արտահան,  Մարութա սար  ….

Կարինէ Աւագեան

 

Scroll Up