Աւարտեցաւ «Արի Տուն-2017» Ծրագիրի 7-րդ Փուլի Հայոց Լեզուի Ուսուցման Դասընթացքը

Ինչպիսին ալ եղած ըլլայ հայերու ճակատագիրը (իսկ այն անցեալին դառն  եղած է), ինչպիսին ալ ըլլայ ան ապագային, անոնց երկիրը յաւէտ պիտի մնայ որպէս աշխարհի ամենահետաքրքիր երկիրներէն մէկը:

      Ճորճ Պայրոն

Օգոստոս 7-ին Երեւանի Եղիշէ Չարենցի անուան դպրոցին մէջ ՀՀ սփիւռքի նախարարութեան «Արի տուն-2017» ծրագիրի 7-րդ փուլի Հայոց լեզուի ուսուցման դասընթացքը  աւարտեցաւ Սփիւռքի նախարարութեան Համահայկական ծրագիրներու վարչութեան գիտակրթական ծրագիրներու բաժինի պետ տիկին Սիրվարդ Համբարեանի բացման խօսքով:

«Հայերն այսօր»-ի փոխանցմամբ, ան ողջունեց Ռուսաստանէն, Վրաստանէն, Հոլանտայէն, Ֆրանսայէն, ՊԵլճիգայէն, Լեհաստանէն, ԱՄՆ-էն, Լիբանանէն, Սուրիայէն ժամանած արիտունցիներուն` ընդգծելով, որ  «Արի տուն»-ը  ոչ միայն կը նպաստէ, որպէսզի պատանիներն ու աղջիկները ճաչնան իրենց հայրենիքն ու ազգային արժէքները, այցելեն պատմական, տեսարժան ու մշակութային վայրերը, այլեւ լաւագոյն հնարաւորութիւն է բազմամշակութային հաղորդակցութեան,արժէքներու փոխանակման:

Այս փուլին մէջ փոքրաքանակ  էր հայերէնի իմացութեամբ առանձնացող արիտունցիներու թիւը, հետեւաբար, գրեթէ բոլոր խումբերուն մէջ տարուեցան տառուսուցման ու խօսքի զարգացման նպատակաուղղուած տարաբնոյթ եւ տարատեսակ աշխատանքներ, որոնք տուին ցանկալի արդիւնք:

Առհաւատչեան եզրափակիչ դաս-ցերեկոյթն էր. խումբերէն իւրաքանչիւրը  հանդէս եկաւ ինքնատիպ ելոյթով եւ Հայաստանի պատմամշակութային  հնավայրերու պատկերներն ու ժամանակագրութիւնը ներկայացնող բովանդակալից  պաստառով, որոնց պատրաստման ընթացքին անմիջական մասնակցութիւն ցուցաբերեցին դասաւանդող ուսուցիչներ` Շողիկ Փահլեւանեան, Լուսինէ Հայրիյեան, Մաքրուհի Գէորգեան, Գայեանէ Բաբլոյեան, Լիզա Գինոսեան, Այտա Օհանեան, Սերա Շահինեան:

Դասընթացքին ժամանակ  արիտունցիներուն այցելեց Լիբանանի «Զարթօնք» օրաթերթի խմբագիր պարոն Սեւակ Յակոբեան: Ան ողջունեց ծրագիրի մասնակիցները եւ արժեւորեց հայրենաճանաչողութեան նպաստող «Արի տուն» ծրագիրը, որ կանչ է դէպի հայրենիք, մղում հայ ժողովրդին նուիրուածութեան եւ հայ ինքնութեան  գիտակցման:

Աւանդոյթին համաձայն դասընթացքի փակման բարեմաղթանքներ յղեց  Եղիշէ Չարենցի անուան թիւ 67 դպրոցի տնօրէն տիկին Անահիտ Խեչումեան, որ իր խօսքին մէջ  պատիւ համարեց «Արի տուն» հայրենաճանաչութեան ծրագիրի հայոց լեզուի արագացուած դասընթացներն իրենց դպրոցին մէջ կազմակերպելու իրողութիւնը, որ ոչ թէ պատահականութիւն է, այլ  Լուի Արակոնի դիպուկ բնորոշման  արտացոլանքը. «Մեր դարի ճակատը պսակուած է  շարք մը բանաստեղծներու պայծառ անուններով, Ֆրանսայի մէջ` Ապոլիներն ու Էլիւարտը, Գերմանիոյ մէջ` Ռիլկէն, Սպանիոյ մէջ` Կարսիա Լորկան, Ռուսաստանի մէջ` Մայակովսկին ու Եսենինը, Հայաստանի մէջ` Չարենցն ու Իսահակեանը»:

 

 

Scroll Up