Ֆրանսախօս Երկիրներու 8-րդ Մարզամշակութային Խաղերէն Հայաստանի Պատուիրակութիւնը Մրցանակներով Վերադարձած է

Յուլիս 21-30, Ապիճան քաղաքին մէջ (Գոտ տիվուար` Փղոսկրէ ափ) իրականացած են Ֆրանսախօս երկիրներու 8-րդ մարզամշակութային խաղերը, որուն մասնակցած է նաեւ Հայաստանի Հանրապետութեան պատուիրակութիւնը` ՀՀ մշակոյթի նախարարի տեղակալ Արեւ Սամուէլեանի գլխաւորութեամբ:

Հայաստանեան պատուիրակութիւնը խաղերուն մասնակցած է հետեւեալ կազմով եւ մրցակարգերու մէջ. «Երգ» (Անի Սարգսեան), «Պար» (Արփինէ Բալայեան եւ Գեղամ Յակոբեան), «Քանդակագործութիւն» (Հայկ Ղազարեան), «Նկարչութիւն» (Արարատ Մինասեան), «Լուսանկարչութիւն» (Անոյշ Բաբաջանեան), «Գրականութիւն» (Աննա Բաղդասարեան), «Հեքիաթ» (Մերի Գալստեան):
Անուշ Բաբաջանեանը «Լուսանկարչութիւն» անուանակարգին մէջ արժանացած է Արծաթէ մետալի, իսկ Աննա Բաղդասարեանը «Գրականութիւն» անուանակարգին մէջ` Յատուկ մրցանակի եւ Լիոն քաղաքի մէջ պատմավէպի հրատարակութեան հրաւէրի:

Ֆրանսախօս երկիրներու մարզամշակութային խաղերու միւս կարեւոր բաղադրիչը մարմնակրթութիւնն է: Այս տարի նոյնպէս հայաստանեան պատուիրակութեան մարզիկները արժանացան բարձր պարգեւներու` Ոսկէ, Արծաթէ, Պրոնզէ մետալներու: Ազատ ոճի ըմբշամարտի մէջ հանդէս եկած Խաչատուր Պապիկեանը իր քաշային կարգով արժանացած է Ոսկէ մետալի եւ դրամական խրախուսանքի, նոյն ոճի տարբեր քաշային կարգերու մէջ Մարզպետ Գալստեանը, Վարուժան Կաճոյեանը եւ Մխիթար Գրիգորեանը արժանացած են Արծաթէ մետալներու, իսկ Վաղինակ Մաթեւոսեանը եւ Աշոտ Վելիցեանը` Պրոնզէ մետալներու: Ճիւտօ մարզաձեւին մէջ Պրոնզէ մետալի արժանացած է Գրիգոր Սահակեանը:

Գոտ տիվուարի Հանրապետութեան Ֆրանսախօս երկիրնրու 8-րդ միջազգային խաղերու պատասխանատու` նախարար Ռոպերթօ Պէյուկրէ Մամպիի հրաւէրով ՀՀ մշակոյթի նախարարի տեղակալ Արեւ Սամուէլեանը Յուլիս 22-ին եւ 23-ին մասնակցած է նաեւ ֆրանսախօս երկիրներու մշակոյթի նախարարներու 4-րդ համաժողովին: «Մշակոյթը` իբրեւ մարդկութեան կայուն զարգացման գործօն» թեմատիկ քննարկման ընթացքի մէջ նախարարի տեղակալը հանդէս եկած է ելոյթով եւ ներկայացուցած է Հայաստանի մէջ մշակոյթի ոլորտի ռազմավարական ու կարեւոր ուղղութիւնները: Ա. Սամուէլեանը ներկաներուն յիշեցուցած է նաեւ, որ 2018 թուականի Հոկտեմբերին Հայաստանի մէջ պիտի կայանայ Ֆրանսախօս երկիրներու գագաթաժողովը: Ֆրանսախօս երկիրներու մշակոյթի նախարարներու յաջորդ համաժողովը տեղի պիտի ունենայ 4 տարի յետոյ` Քէպէքի մէջ:

Համաժողովի աւարտին ստորագրուած է յուշագիր:
Յիշեցնենք, որ Ֆրանսախօս երկիրներու միջազգային կազմակերպութիւնը հիմնադրուած է 1970 թուականին, որուն մէջ ընդգրկուած են 57 լիիրաւ, 3 ընկերացուած եւ դիտորդի կարգավիճակ ունեցող 20 պետութիւն: Ֆրանսախօս երկիրներու մարզամշակութային խաղերը կ՝իրականացուին չորս տարին մէկ:
ֆրանսախօս երկիրներու 8-րդ մարզամշակութային խաղերուն նուիրուած մամուլի ասուլիսին մասնակցած են ՀՀ մշակոյթի նախարարի տեղակալ Արեւ Սամուէլեան եւ ՀՀ մարմնակրթութեան, երիտասարդութեան հարցերով նախարարի տեղակալ Գաբրիէլ Ղազարեան:

 

Scroll Up