ՀԵԸ-ի Ամառնային Դպրոց-2017

Երկար տարիներէ ի վեր աւանդութիւն դարձած է Ամառնային դպրոցի ծրագիրը:

Քաղաքիս անապահով պայմանները սահմանած էին մեր գործունէութիւնը, բայց երբ նպատակը հայ մանուկներուն հաճելի պահեր պարգեւելն էր, ՀԵԸ անշարժ չէր կրնար մնալ: 2016-ին ՀԵԸ-ի Գործադիր Մարմինը 5 տարի ընդմիջումէ ետք, յաղթահարելով բոլոր պայմանները, կեանքի կոչեց Ամառնային դպրոցի ծրագիրը, որուն մասնակցութիւն բերին 85 փոքրիկներ: Ծրագիրը պսակուեցաւ գերազանց յաջողութեամբ:

Այս տարի, ոգեւորուած 2016-ի յաջողութենէն, ծնողներու փափաքով որոշուեցաւ դարձեալ կազմակերպել Ամառնային դպրոցի ծրագիրը՝ հաճելի եւ զուարճալի մթնոլորտի մը մէջ:

2017-ի Ամառնային դպրոցը վերսկսեցաւ Երկուշաբթի, 29 Մայիս 2017-ին, ՀԵԸ-ի յարկին ներքեւ, հինգ շաբթուան տեւողութեամբ:  Ծրագիրին մասնակցեցան 152 փոքրիկներ:

Այս տարուան Ամառնային դպրոցի խորագիրն էր «Խաղաղութիւն, Երջանկութիւն եւ Սէր»:

5 շաբթուան ընթացքին փոքրկները մասնակցեցան զանազան յայտագիրներու, ունէին գիտելիքներու յատուկ գիրքեր, ֆրանսերէն գրականութեան  պահեր՝ ուսուցչուհի Սիւզի Եագուպեանի պատրաստութեամբ, ունէին նաեւ համակարգիչի պահեր:

Ամառնային դպրոցի տնօրէնուհի Մարիա Պարտագճեանի համաձայն, առաջին շաբթուան ընթացքին մասնակիցները ներկայ եղած են «The Last Village Of Smurfs»  ժապաւէնի ցուցադրութեան,  Զահրաա շարժապատկերի սրահէն ներս: Ապա այցելած են խաղաղ Հալէպի հզօր բերդը: Երկրորդ շաբաթ յատկանշանական պտոյտ մը ունեցած են դէպի շոգեկառքի կայարան եւ շոքեկառքով մեկնած են ճպրին: 3-րդ եւ 4-րդ շաբաթները անոնք այցելած են բրուտի արհեստանոց, հանրային պարտէզ, ապա   աւազան՝ լողալու: 5-րդ շաբաթը այցելած են  Ս. Յակոբ եկեղեցի, ուր եկեղեցւոյ թաղականութիւնը շատ լաւ ընդունած եւ հիւրասիրած է փոքրիկները: Տէր Գառնիկ Քհն. Չափանեան փոքրիկներուն ներկայացուցած է տեղեկութիւններ եկեղեցւոյ եւ Ս. Աստուածաշունչի մասին:

Հինգ շաբթուան ընթացքին փոքրիկները մասնակցած են նաեւ յատուկ դասընթացքներու եւ հիւրընկալուած են “حلم” եւ “سنايا” գիտական կեդրոններու անձնակազմերուն կողմէ:

Ապա անոնք հիւրընկալուած են Ճինիշեան Հաստասատութեան կողմէ, ուր  հաստատութեան տնօրէնուհի Թալին Թոփալաքեան  անձնապէս  հիւրասիրած է փոքրիկները: Անոնք այցելած են նաեւ պարտէզ եւ Հալէպի թաղամասերու մէջ ծաղիկներ ծաղիկներ ցանած են՝ Հալէպի բարելաւման համար, ետքը այցելած են “Pepperoni” ճաշարան, ուր սորված են “Pizza”  պատրաստել եւ ետքը համտեսած են համեղ “Pizza”-ները:

Ամառնային դպրոցի աւարտին աւանդութիւն դարձած է հանդէսը, որուն ընթացքին ամէն մէկ դասարան կը ներկայացնէ պար, ապա բոլոր աշակերտները միասին հանդէս կու գան երգչախումբով մը:

Հանդէսը տեղի ունեցաւ Ուրբաթ, 30 Յունիս 2017-ին, ՀԲԸ Միութեան կեդրոնէն ներս, 350 հրաւիրեալներու ներկայութեան:

Այս մեծ եւ հրաշալի գործը չէր իրագործուեր առանց ուսուցչական կազմին եւ տնօրէնուհիին: Փոքր խումբով անկարելին դարձուցին կարելի, հսկողութեամբ Մարիա Պարտագճեանին, 5-րդ եւ 4-րդ դասարանի ուսուցչուհիներ Նուշիկ Զէյթունցեանի, 3-րդ դասարանի ուսուցչուհի Մարիա Աբգարեանի, 2-րդ դասարանի ուսուցչուհի Քարոլին Աբգարեանի, առաջին դասարանի ուսուցչուհի Թալին Քէհեայեանի, Ծաղիկ դասարանի ուսուցչուհի Նուէր Ներսէսեանի, եւԿոկոն, Բողբոջ եւ Ծիլ դասարաններու ուսուցչուհի Տաթեւիկ Գրտանեանի:

2017-ի Ամառնային դպրոցը հասաւ  իր աւարտին, փոքրիկները հաճելի յիշատակներով  վերադարձան իրեն առօրեային:

  Թղթակից

Գանձասար

Scroll Up