#3խորհուրդ սուրիահայէ ծրագիրի ծիրէն ներս կը ներկայացնենք «Հայերն այսօր»-ի հարցազրոյցը «Թաուկ» ճաշարանի սեփականատէր Վիգէն Փիլիպոսեանի հետ:

– Երբ տեղափոխուած էք Հայաստա՞ն:

– Հայաստան  տեղափոխուած եմ 5 տարի առաջ Հալէպէն, եւ երբեք ետ չեմ նայած:

– Սա ձեր առաջին գործն է՞:

– Ո՛չ, երկրորդ: Առաջինը, տարիներ առաջ ընկերոջս հետ բացի, սակայն ձգեցի եւ Հայաստանէն ժամանակաւորապէս հեռացայ: Ընտանիքով տեղափոխուեցանք Եւրոպա` Հոլանտա: Սակայն հասկցայ, որ Հայաստանէն աւելի լաւ տեղ չկայ, եւ ետ վերադարձանք:

– Ինչը ձեզի ստիպեց Հայաստան վերադառնա՞լ. կարօտը՞:

– Հայաստանի մէջ կեանքն աւելի հեշտ է: Երեխաներն ինքնուրոյն կ’երթան դպրոց եւ կը վերադառնան: Բացի այդ, այստեղ բոլորը հայ են: Մենք այնտեղ պէտք է կորսնցնէինք մեր ինքնութիւնը: Սուրիոյ մէջ այնքան պայքարած ենք, որ հայ մնանք եւ մեր երեխաները հայ մեծնան: Մենք խափուեցանք, մտածելով, որ Հոլանտայի մէջ աւելի լաւ կ’ըլլայ, բայց մեր կեանքն այստեղ շատ աւելի լաւ է:

– Իսկ երբ հիմնեցի՞ք «Թաուկ»-ը:

– «Թաուկ»-ը բացի Հոլանտայէն վերադառնալէս 2 ամիս ետք:

– Ինչ կը նշանակէ՞ «Թաուկ»:

– Թաուկ արաբերէն կը նշանակէ «հաւ»: Հայաստանէն դուրս ասիկա ապրանքանիշ է, եւ շատերը կը ճանչնան: Հաւով շաուրմային շատ նման է, բայց պատրաստման եղանակը տարբեր է: Մեր ճաշարանին մէջ տարբեր տեսակի թաուկներ կան` մեքսիքական, շիշ-թաուկ: Ուրիշ ճաշարաններու մէջ ալ  թաուկ կը մատուցեն, բայց ես այստեղ  խորովելով կ’ընեմ: Շատ համեղ է` յատկապէս յատուկ սոուսով:

– Ինչ խորհուրդ կու տաք այն մարդո՞ց,  որոնք  նոյնպէս ցանկութիւն  ունին Հայաստանի մէջ գործ հիմնելու:

– Նախ պէտք չէ միանգամէն մեծ գործ բանալ: Պէտք է սկսիլ փոքրէն, եւ յետոյ մտածել գործը  մեծցնելու մասին: Երկրորդ` պէտք է շատ համբերատար ըլլալ, որպէսզի կարենաս որեւէ բան ընել: Երրորդ` պէտք է հեռատես ըլլալ:

Լաուրա Սամուէլեան