ՀՀ սփիւռքի նախարար Հրանոյշ Յակոբեան ընդունեց Մեծի Տանն Կիլիկիոյ Կաթողիկոսութեան Քուէյթի Հայոց թեմի առաջնորդ Մասիս ծայրագոյն վարդապետ Զոպույեանը եւ Քուէյթի ազգային վարժարանի տնօրէն Ներսէս Սարգսեանը:

Ողջունելով հիւրերը` նախարարը բարձր գնահատեց Մեծի Տանն Կիլիկիոյ Կաթողիկոսութեան Քուէյթի թեմի գործունէութիւնը, հայապահպանութեան ուղղուած ջանքերը եւ իր գոհունակութիւնը արտայայտեց այն հայապահպան գործունէութեան համար, որ կ’իրականացնեն Քուէյթի երկու առանցքային կառոյցները:

Նախարարը նշեց, որ հպարտութեամբ կը համակէ համայնքը, ուր հայերը շատ մեծ ներդրում ունին հայ-քուէյթեան յարաբերութիւններուն, Քուէյթի տնտեսութեան, մշակոյթի զարգացման գործին մէջ: 15 հազարնոց հայկական համայնքը Քուէյթի մէջ զբաղուած է արհեստագիտութեան ոլորտներուն մէջ, կը փայլի ստեղծագործական աշխատանքով: Նախարարը կարեւոր համարեց սփիւռքի նախարարութեան ծրագիրներուն համայնքի աշխոյժ մասնակցութիւնը:

Հիւրերը շնորհակալութիւն յայտնեցին Սփիւռքի նախարարութեան եւ, մասնաւորապէս նախարար Հրանոյշ Յակոբեանին ջերմ ընդունելութեան այն հետեւողական աջակցութեան համար, որ կը ցուցաբերեն Քուէյթի ազգային վարժարանին եւ ողջ համայնքին:

Մասիս ծայրագոյն վարդապետ Զոպույեան կարեւոր համարեց Սփիւռքի նախարարի այցելութիւնները, նշեց որ ատոնք մեծ ոգեւորութիւն կ’առաջացնեն համայնքներուն մէջ, ուր նախարարին խօսքերը կ’ընկալեն, որպէս ուղերձներ: Ան նշեց, որ Սփիւռքը մեծ երախտագիտութեամբ կ’ընդունի նախարարութեան աջակցութիւնը եւ բարձր  կը գնահատէ այն առաքելութիւնը, որ կ’իրակնացնէ նախարարն ու նախարարութեան աշխատակազմը:

Նախարար Հրանոյշ Յակոբեան շնորհակալութիւն յայտնեց եկեղեցւոյ եւ ազգային վարժարանին նուիրումին, աշխուժութեան ու հայրենիքին աջակցելու պատրաստակամութեան համար: