Կրթասիրաց Ս. Չէմպէրճեան Երկրդ. Վարժարանի Միջնակարգի Եւ Երկրորդականի Վկայականաց Բաշխման Հանդիսութիւն. լուսանկարներ

2016-2017 Ուսումնական Տարեշրջանի աւարտին յետ պետական քննութիւններուն սպասուած ուրախ մթնոլորտի մէջ տեղի ունեցաւ Կրթասիրաց Ս. Չէմպէրճեան Երկրդ. Վարժարանի միջնակարգի եւ երկրորդականի վկայականաց բաշխման հանդիսութիւնը Կիրակի 25 Յունիս 2017-ին, Կրթասիրաց Մշկթ. Միութեան «Զ. Գաբրիէլեան» սրահէն ներս:
Հանդիսութիւնը բացուեցաւ Սուրիոյ եւ Հայաստանի քայլերգներով, ապա ներկաները մէկ վայրկեան յոտնկայս յարգեցին յիշատակը բոլոր նահատակներուն:
Արաբերէն լեզուով բացման խօսք ներկայացուցին 9-րդ կարգէն Ճորճ Իպրահիմ եւ Սուրէն Թամեր, իսկ հայերէն լեզուով 12-րդ կարգէն՝ Մեղեդի Գույումճեան եւ Դալար Ֆսթքճեան, որոնք իրենց երախտագիտական խօսքերով եւ յուզումնախառն զգացումներով լաւագոյնը մաղթեցին հայակերտումի ջերմ կրթօճախին:
Օրուան Հանդիսավարն էր՝ Մարինա Չիլ Աբոշեան-Պօղիկեան:
Ելոյթ ունեցաւ վարժարանի աշակերտական երգչախումբը մասնակցութեամբ՝ 9-րդ եւ 12-րդ կարգերու կարգ մը շրջանաւարտ աշակերտներու, գեղարուեստական ղեկավարութեամբ՝ Բժ. Սարգիս Իսկէնեանի: Ապա կիթառի վրայ գեղեցիկ ստեղծագործութիւն մը ներկայացուց 9-րդ կարգէն Պօղոս Փայասլեանը: Յաջորդաբար 9-րդ եւ 12-րդ կարգերէն խումբ մը աշակերտներ արաբերէն լեզուով ասմունքեցին: Ապա Թատերական պատկեր եւ հայերէն լեզուով ասմունք ներկայացուցին միջնակարգի եւ երկրորդականի խումբ մը աշակերտներ, պատրաստութեամբ՝ Օրդ. Յուշիկ Ղազարեանի:
Հայկական եւ արաբական պարերով հանդիսութիւնը ճոխացուցին խումբ մը շրջանաւարտ աշակերտներ, Կրթասիրաց Մշկթ. Միութեան «Շող» պարի դպրոցի ղեկավարութեամբ:
Ուրախութեան պահեր ապրեցանք երբ անակնկալօրէն ժամանեց Հայաստանի Հանրապետութեան Հալէպի Գլխաւոր Հիւպատոս Մեծարգոյ Տիար Տիգրան Գէորգեան պարգեւատրելու Կրթասիրաց Ս. Չէմպէրճեան Երկրդ. Վարժարանի Տնօրէն, ազգային գործիչ Երկրչ. Անդրանիկ Պօղոսեանը Հայաստանի Հանրապետութեան Վսեմաշուգ Նախագահ Տիար Սերժ Սարգիսեանի կողմէ շնորհուած Երախտագիտութեան մետալով ու գնահատագիրով, որուն համար յարգարժան տնօրէնը իր շնորհակալութիւններն ու երախտագիտութիւնը յայտնեց Հայաստանի Հանրապետութեան վսեմաշուք նախագահին եւ մեծարգոյ հիւպատոսին: Ապա ընթերցուեցաւ Կրթասիրաց Մշկթ. Միութեան Խնամակալութեան շնորհաւորական նամակը ուղղուած յարգարժան Տնօրէնին, պարգեւատրումի ուրախ առիթով:
Այնուհետեւ Տնօրէն Անդրանիկ Պօղոսեանի եւ Օրդ. Մարալ Դերձակեանի ձեռամբ տեղի ունեցաւ 2016-2017 տարեշրջանի միջնակարգի եւ երկրորդականի առաջնակարգ աշակերտներու, ինչպէս նաեւ «Արմէն Յարութիւնեան» շարադրութեան եւ հայոց պատմութեան մրցանակներու առաջին երեք դիրքեր գրաւող աշակերտներու պարգեւատրում: Յատուկ գիրով պարոն Տնօրէնը պարգեւատրեց Վարժարանիս երկրորդականի վաստակաւոր տեսուչ Բժ. Ճորճ Դաւիթեանը: Ապա Պարոն տնօրէնը փոխանցեց իր սրտի խօսքը, շնորհաւորելով շրջանաւարտներն ու անոնց ծնողները աւարտական հանդէսի ուրախ առիթով, նշելով, որ 1924 թուականէն մինչեւ օրս Կրթասիրաց կրթօճախը ամէն տարի իր ազգին կը նուիրէ փունջ մը երիտասարդներ հաւատարիմ իրենց հայրենիքին եւ ազգին, շարունակելով այն առաքելութիւնը, որ կերտուած է ազգանուէր եւ նուիրեալ հիմնադիրներուն կողմէ: Պարոն Անդրանիկը յայտնեց, թէ Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա. Վեհափառ Հայրապետ 2017 տարին հռչակեց «Վերականգնումի Տարի» քաջ գիտակցելով հալէպահայութեան կեանքի վերանորոգութեան անհրաժեշտութիւնը եւ որպէս հալէպահայեր հրաւիրեց ներկաները մեր կառոյցներու վերականգնումին հետ մէկտեղ վերանորոգել նաեւ մտքերն ու հոգիները, օգնելով մեր նոր սերունդին ուսմամբ եւ աշխատանքով զօրանալ՝ ի նպաստ մեր հալէպահայ գաղութի կեանքին: Ան շնորհակալական խօսք ուղղեց Վարժարանի հոգատար մարմիններուն՝ Կրթասիրաց Մշկթ. Միութեան Խնամակալութեան եւ Վարժարանի Հոգաբարձութեան: Շնորհակալութիւն յայտնեց ուսուցչական կազմին ի մասնաւորի Օրդ. Մարալ Դերձակեանին, Կրթասիրաց Մշկթ. Միութեան «Շող» Պարի դպրոցին եւ քուլիսներու ետին իրեց ներդրումը բերողներուն: Երախտագիտական խօսք ուղղեց Բերիոյ Հայոց Թեմի Բարեջան Առաջնորդ՝ Գերշ. Տ. Շահան Արք. Սարգիսեանին իր հայրական հովանաւորութեան համար: Շնորհակալութիւն յայտնեց վարժարանի պետական տնօրէնին եւ Հալէպի կրթական տնօրէնութեան: Ի վերջոյ յատուկ շնորհակալութիւն սուրիական հայրենիքին, բանակին եւ անոր վսեմաշուք նախագահ Տոքթ. Պաշար Ալասատին:
Բեմ բարձրացան 9-րդ եւ 12-րդ կարգի աշակերտները: Հրաժեշտի խօսք ներկայացուցին 12-րդ կարգէն արաբերէն լեզուով Լին Իշուհ եւ Թոնի Եուսէֆ, իսկ հայերէն՝ Մեղեդի Գույումճեան եւ Դալար Ֆսթքճեան իրենց որդիական բարեմաղթութիւնները ուղղելով Կրթասիրաց կրթօճախին:
Այնուհետեւ Պարոն Տնօրէնը հրաւիրեց վարժարանի հոգեւոր հովիւ՝ Արժ. Տ. Եզնիկ Քհնյ. Զղջանեանը կատարելու վկայականաց բաշխումը: Հանդիսութեան աւարտին իր սրտի խօսքը փոխանցեց քահանահայրը: Ան յայտնեց Առաջնորդ Սրբազան Հօր հայրական օրհնութիւններն ու շնորհաւորանքները: Քահանահայրը նշեց, թէ Կրթասիրաց վարժարանէն աւարտող աշակերտը կը զինուի երկու զէնքերով՝ հայեցի դաստիարակութեամբ եւ գիտութեան լոյսով:
Հանդիսութիւնը փակուեցաւ «Պահպանիչ» աղօթքով:
Երկուշաբթի 26 Յունիս 2017-ին տեղի ունեցաւ շրջանաւարտներուն խրախճանքը, Կրթասիրաց Մշկթ. Միութեան պարտէզէն ներս, ներկայութեամբ Բերիոյ Հայոց Թեմի Բարեջան Առաջնորդ՝ Գերշ. Տ. Շահան Ս. Արք. Սարգիսեանի, որ իր օրհնաբեր ներկայութեամբ մասնակցեցաւ կարկանդակի հատումին: Խրախճանքը վարեց Օրդ. Յուշիկ Ղազարեանը: Գեղարուեստական յայտագիրով Մեղեդի Գույումճեան եւ Լիլա Աթաշեան գեղեցկօրէն ասմունքեցին, իսկ Պօղոս Փայասլեան կիթառի վրայ նուագեց: Այնուհետեւ Առաջնորդ Սրբազան Հայրը փոխանցեց իր սրտի խօսքը, Ազգ. Իշխանութեան անունով շնորհաւորելով Կրթասիրաց Ս. Չէմպէրճեան Երկրդ. Վարժարանի օր ըստ օրէ աճող հաստատութիւնը, իր Հոգաբարձութեամբ, Ծնողաց Յանձնախումբով, տնօրէնով եւ ուսուցչական կազմով, որոնք կը գործեն Կրթասիրաց Մշկթ. Միութեան Խնամակալութեան աջակցութեամբ: Առաջնորդը շնորհաւորեց Պարոն Անդրանիկ Պօղոսեանը Հ.Հ.վսեմաշուք նախագահին կողմէ երախտագիտութեան շքանշան եւ գնահատագիր ստանալուն առիթով: Խօսքի աւարտին շնորհաւորեց շրջանաւարտները ուսումնակրթական կեանքէն ներս յարատեւ վերելք մաղթելով անոնց:
Թղթակից

Scroll Up