Յուլիս 6-ին «Առնօ Բաբաջանեան» համերգասրահին մէջ տեղի ունեցաւ «Հայկական երաժշտութիւնը լիբանանեան կատարմամբ» խորագիրով համերգ` նուիրուած «Թէքէեան» մշակութային միութիւններու հիմնադիր մարմնի 70-ամեակին: Համերգը կազմակերպուած է ՀՀ սփիւռքի եւ մշակոյթի նախարարութիւններու հովանաւորութեամբ եւ Լիբանանի մէջ ՀՀ դեսպանութեան հետ համագործակցութեամբ:

Ողջոյնի խօսքով հանդէս եկաւ ՀՀ սփիւռքի նախարար Հրանոյշ Յակոբեան: Ան շնորհաւորեց բոլորը եւ նշեց. «Սիրելի լիբանանցիներ եւ Լիբանանը սիրող հայեր, ուզում եմ շնորհաւորել բոլորիս այս գեղեցիկ երեկոյի առթիւ: Երեխաներն այսօր է’լ աւելի ամուր կամրջեցին հայ լիբանանեան բարեկամութիւնը: Այս օրերը դարձան լիբանանեան օրեր Հայաստանում: Ուրախ եմ ողջունել բոլորիդ Հայաստանում` մի մասիդ` Հայրենիքում, միւս մասիդ` բարեկամ երկրում: Բարով էք եկել»:

Նախարարը «Թէքէեան» մշակութային միութեան Լիբանանի շրջանային վարչութեան ատենապետ Վիգէն Ասսիլեանին պարգեւատրեց ՀՀ սփիւռքի նախարարութեան Ոսկէ մետալով, իսկ լիբանանահայ դաշնակահարուհի, «Հայկական երաժշտութիւնը լիբանանեան կատարմամբ» խորագիրով համերգի գեղարուեստական ղեկավար Ռիթա Ասսիլեանը պարգեւատրուեցաւ ՀՀ սփիւռքի նախարարութեան պատուոգիրով:

Հնչեցին հայ մեծանուն երգահաններու` Կոմիտասի, Ա.Խաչատրեանի, Ա.Բաբաջանեանի, Է. Յովհաննիսեանի եւ այլոց ստեղծագործութիւնները` 1 հայ եւ 9 արաբ պատանի երաժիշտներու կատարմամբ` Թամար Ասսիլեան, Մաքրամ Մասուտ, Քլարա Եազիգի, Սէրէնա Սալամեհ, Ռեբեքա Էլ Պիթար Ղանըմ, Լիա Սալամեհ, Ամըր Ռատի, Զէյնա Քարամ, Քիաննա Ռատի, Սառա Չալիտտա:

Հայաստանէն լիբանանցի հիւրերուն համար ելոյթ ունեցաւ մեներգչուհի Արփի Սինանեան: Ան հանդէս եկաւ Ռ. Պետրոսեանի «Նազանք» ստեղծագործութեան եւ «Արաբական երաժշտութեան» կատարմամբ: