Փասատինայի Մանուկեան Եւ Յովսէփեան Վարժարաններէն Աջակցութիւն՝ Հայաստան Ապաստանած Սուրիահայերուն

ՀԲԸՄի Վաչէ եւ Թամար Մանուկեաններու երկրորդական վարժարանի «National Honors Society»ի աշակերտներուն այս տարուան գլխաւոր աշխատանքը հանդիսացած է՝ Հայաստանի մէջ գործող «Հալէպ» հայրենակցական բարեսիրական հասարակական կազմակերպութեան (ՀԲՀԿ) օժանդակութիւն ցուցաբերելը: Աշակերտները ձեռնարկած են Հայաստան ապաստանած հալէպահայերու համար հագուստներու ապահովման ու առաքման գործին: Իրենց դպրոցէն բացի, Փասատինայի մէջ գործող քոյր վարժարանը՝ Ս. Գրիգոր Լուսաւորիչ եկեղեցւոյ Ա. եւ Մ. Յովսէփեան վարժարանը, նոյնպէ՛ս միացած է ձեռնարկին:

Երկու վարժարաններուն ջանքերով հաւաքուած են 9 մեծ տուփ հագուստներ: Տուփերու առաքումը կազմակերպելուն մեծապէս նպաստած են ծնողներու կողմէ կատարուած նուիրատուութիւնները, ինչպէս նաեւ՝ «Յովսէփեան»ի 8րդ դասարանի աշակերտներուն կատարած դրամահաւաքը: Նաեւ, «National Honors Society»ի աշակերտները ձեռնարկած են մօտաւորապէս երկու ամիս տեւողութեամբ՝ պաղպաղակի եւ քաղցրեղէնի վաճառքի, որ նմանապէս նպաստած է տուփերուն դէպի Հայաստան առաքման:

Վարձքը կատար բոլոր աշակերտներուն եւ ծնողներուն, որոնք շտապեցին օգնելու նմանօրինակ վսեմ աշխատանք մը յաջողութեամբ կատարելուն:

«Հալէպ» հայրենակցական բարեսիրական հասարակական կազմակերպութիւնը իր խորին երախտագիտութիւնը կը յայտնէ աշակերտներուն եւ անոնց ծնողներուն, մասնաւորապէս՝ ծնողք Լիզա Մանոյեանին եւ աշակերտ Մեղեդի Մանոյեանին, «Հալէպ» ՀԲՀԿի գործունէութեան վստահելուն եւ Հայաստան հաստատուած սուրիահայ համայնքին օժանդակութիւն ցուցաբերելու համար: Հագուստները ընտանիքներուն պիտի տրամադրուին անմիջապէս, երբ Հայաստան հասնին:

Թղթակցութիւնը՝ «Հալէպ» ՀԲՀԿէն

Scroll Up