«Թէքէեան Կեդրոն» հիմնադրամը եւ Photo.Podium.com համացանցային պաշարը կը հրաւիրեն ներկայ գտնուելու մոսկուաբնակ հայ լուսանկարիչ Սերգէյ Գասպարեանի «Ստորջրեայ աշխարհի գաղտնիքները» անհատական ցուցահանդէսի բացման, որ տեղի պիտի ունենայ ս.թ. Յունուար 17-ին, ժամը` 15.00-ին, Թէքէեան Կեդրոնին մէջ /հասցէ` Խանջեան 50/:

Սերգէյ Գասպարեան ծնած է 1953թ. Մոսկուա, բժիշկներու ընտանիքի մէջ: Կրթութեամբ եւ մասնագիտութեամբ վիրաբոյժ է, բժշկական գիտութիւններու դոկտոր: 35 տարի կ’աշխատի Ռուսաստանի յառաջատար եւ համաշխարհային ճանաչում ունեցող ՌԲԳԱ–ի Ն. ն. Պուրտենկոյի անուան նեյրովիրաբուժութեան գիտահետազօտական հիմնարկին մէջ` որպէս ջիղերու վիրահատութեան բաժինի պետ: Ամբողջ ազատ ժամանակը կը նուիրէ լուսանկարչութեան, մասնաւորապէս` ստորջրեայ լուսանկարչութեան: Ըլլալով նաեւ փորձառու ջրասուզակ, կրցած է պատկերել մեր մոլորակի տարբեր ծովերու եւ ովկիանոսներու ստորջրեայ հրաշալիքները:

Մոսկովեան ժամանակակից լուսանկարչական ոլորտի աշխոյժ մասնակից է: Արհեստավարժ նկարիչներու ստեղծագործական միութեան (լուսանկարչութեան բաժին) անդամ է: Մասնակցած է  շարք մը միջազգային ցուցահանդէսներու Երեւանի, Գիւմրիի, Թիֆլիսի, Մոսկուայի, Ս.Փեթերսպուրկի, Մինսքի մէջ. արժանացած է մրցանակային տեղերու: